Кинигэни таптааччылар 1-кы бэстибээллэрэ буолла

Аан дойдутааҕы кинигэни таптааччылар күннэрин чэрчитинэн бүгүн Эргэ куоракка аан бастаан кинигэни таптааччылар 1-кы бэстибээллэрэ буолан ааста.

«Куруһаала» атыы-эргиэн киинин аттыгар араас кинигэ барыта баар. Холобура, 1935 сыллаахха бэчээттэммит кинигэттэн саҕалаан, сэбиэскэй кэминээҕи ыччаттар В.И. Ленин ыччакка туруорбут соруктарын хомсомуол кэккэтигэр киирээри туран, элбэхтэ нойосуустаабыт кинигэлэрин кытта көрүөххэ сөп.

Тэрээһиҥҥэ кинигэни таптыыр кэлиэксийэниэрдэр хото кэлбиттэр. Кинилэр ортолоругар педагогическай үлэ бэтэрээнэ, РСФСР үөрэҕириитин туйгуна, Учууталлар учууталлара, “Горнай улууһун үөрэҕириитэ сайдыытыгар кылаатын иһин”  бэлиэ хаһаайына, “Саха сирин кэлиэксийэниэрдэрэ” уопсастыба чилиэнэ Розалия Попова быыстапката дьон болҕомтотун тарта.

Розалия Иннокентьевна кыра кээмэйдээх кинигэлэри муспута 40-тан тахса сыл буолбут. Нуучча классиктарыттан саҕалаан, саха суруйааччыларыгар тиийэ кыра кээмэйдээх кинигэлэри көрөн, киһи олуһун сөҕөр. Нуучча тылын учуутала буолан, Александр Пушкин, Сергей Есенин дьоҕус кинигэлэрэ үгүс.

Розалия Попова бэрт элбэх сахалыы, нууччалыы хоһооннору аахпытын  «Саха сирэ» хаһыат ТГ-ханаалыгар https://t.me/sakhasire20/59622 сигэнэн  сиһилии билсиэххэ сөп.