Кипр визатын биэрэр кииннэр аһылыннылар

Ахсынньы 15 күнүгэр Арассыыйа үрдүнэн Кипр визатын биэрэр аҕыс киин аһылынна. Урут визаны консульствоттан эрэ ылар кыахтааҕыҥ.

Бу Петербурга, Москваҕа, Новосибирскайга, Доннааҕы Ростовка, Аллараа Новгородка, Казанҥа, Самараҕа уонна Екатеринбурга аһыллыбыт кииннэри BLS International хампаанньа көрүөҕэ-истиэҕэ диэн Москваҕа баар Кипр посольствотын официальнай саайтыгар этиллэр.

Билигин сайабылыанньа биэрээччилэр виза анкеталарын BLS International салайар анал визовай  кииннэригэр биэриэхтэрин сөп. Виза киинигэр сайабылыанньаны биэрии төлөбүрэ НДС учуота суох 1.50 € (140 ₽ кэриҥэ). Ону кытта консульскай төлөбүр эмиэ төлөнүөхтээх, ону Арассыыйа туроператордарын ассоциацията бэлиэтээбитинэн, кылгас болдьохтоох С категориялаах визаҕа 90 евро, 6-тан 11-гэр диэри саастаах оҕолорго 45 евро буолар.