Кирбэй ийэлэрэ түмсэллэр

Өлөөн улууһугар Кирбэй нэһилиэгин “Ийэ мичээрэ” дьахтар хамсааһына биир улахан, үйэлээх үлэни – эбэҥки көс омук көһө сылдьарыгар аналлаах ураһа дьиэ сабыытын таба тириититтэн имитэн уонна тигэн Кирбэй нэһилиэгэр үөрүүлээх быһыыга-майгыга туттардылар.

Ураһа сарыы сабыытын-дьиэ туоһа диэччилэр. Онон соторутааҕыта Кыайыы искибиэригэр суонаа туруоран ураһа анньаттаан саҥат тирии сабыыбытынан сабан үйэлээх, сылаас холумтан буоллун диэн тураммыт, уот оттон, алаадьынан айах тутан алҕаатыбыт.

“Дьүөгэ”, “ Арчы”, “Кирбэй кийииттэрэ”, “Гудейкэн” түмсүүлэр, “ Мичээр”,“Алакуо”, “Северянка” ансаамбыллар кыттыылаахтара имитиигэ, тигиигэ кыттан ураһа сабыыта үс ыйынан бүттэ. Саамай ыарахан үлэтигэр тирии имитиитигэр эдэр ийэлэр, эбээлэр, Өлөөн бөһүөлэгэр олорор ийэлэр көмөлөстүлэр.

Сыраны-сылбаны ылар күүстээх үлэттэн аҕам саастаах эдьиийдэрбит Розалия Ивановна Полуэктова, Елена Константиновна Христофорова, Вера Васильевна Семенова, Ольга Потаповна Васильева туора турбатылар, тирии да имиттилэр, тиктилэр даҕаны. Эдэр ийэлэр тирии имиитигэр практиканы баран наставниктарыгар махтаннылар. Олохтоохтор бэйэлэриттэн 80-ча хаппыт, инчэҕэй тириини аҕалан туттардылар. Тириилэрин иистэнэр сыахха хомуйан, хатаран күүстээх үлэ барда. Киһи санаата көтөҕүллэр, сүргэтэ үөрэр күүстээх үлэҕэ  үмүөрүһэн кэлэн, күүс-көмө, сүбэ-ама буолар ийэлэр, эбээлэр, кийииттэр түмсүүлэрэ баалларыттан. Бука бары хатарыы, имитии, тигии үлэтигэр кыттыбыт Далбар хотуттарга, тирии туттарбыт Кирбэй нэһилиэгин хоһуун булчуттарыгар, табаһыттарыгар махтанабыт, олоҕу хамсатааччы, үлэни сүрүннээччи, дьиэ кэргэн туллар тутааҕа, иэримэ дьиэ иччилэрэ эһиги буолаҕыт!

Надеджа Колодезникова, Өлөөн