«Кирбэй оҕолоругар өбүгэ оонньууларын билиһиннэрдибит»

Ыраах сытар Өлөөн улууһун Кирбэй нэһилиэгэр Ийэ тыл уонна  сурук-бичик күнүгэр анаан олохтоох бибилэтиэкэ иһинэн оҕолорго өбүгэ оонньууларын билиһиннэрдибит. Оҕо сылдьан ханнык өбүгэ оонньууларын оонньообуппутун кэпсээтибит.

Урукку оҕо барыта да хаамысканы сөбүлээн оонньуур этибит, уһун биримиэнэ кэмигэр ким остуолга, ким муостаҕа төгүрүччү олорон оонньуур буоларбыт. Талаҕынан түөрт кырыы гына кыһан, быһан оҥосторбут, оннооҕор чүмэчини кыһан оҥостор этибит. Аныгы кэмҥэ өбүгэ оонньуута — хабылык тарҕаммыта кэрэхсэбиллээх. Илии оонньуута түргэнник өйдүүргэ, сымсатык хамсанарга, тарбах сайдарыгар туһата улахан. Ону тэҥэ бу күн Өлөөммүтүгэр Эбэҥкибит сыла салҕанан бара турар. Онно сөп түбэһиннэрэн, өбүгэбит саҕаттан тутта сылдьар малларбыт ааттарын сөргүтэр, умнуллубатын туһугар 2014 сыллаахха Арктика сылыгар култуура салаатын методиһа Вера Ларионовалыын устубут биэриибитин көрдөрдүбүт. Бу устууга өбүгэ туттар маллара, таҥастара барыта эбэҥкилии тылынан саҥарыллар буолан,  тылы билэ сатыырга улахан көмөлөөх дии саныыбын. Ураһаҕа киирдибит даҕаны эбэҥки буолан хаалабыт диэччибит, киирээт чымкаттан тутуһаҕын, онтон иһиккин иикээптииҥҥэ ыйыыгын.  Бу үлэбит “Саха” НКИХ ханаалыгар куонкуруска кыттан, бастакы миэстэни ылбыт саамай харыстанар, өбүгэни кытта ситимниир сэдэх уонна сэргэх матырыйаалбыт буоларынан киэн туттабыт. Ол саҕана Вера Давыдовна “Өлөөн тэлэбидиэнньэтигэр”  үлэлиир этэ, иккиэн сүбэнэн элбэх тиэмэҕэ биэриилэри оҥорор этибит.

Оҕолорго хаамыскаҕа, хабылыкка оонньооҥ диэн сүбэлээтибит, хайдах оонньонорун быһаардыбыт. Оҕолор эбээлэр оонньуурбутун көрөн сөҕүү бөҕө буоллулар. Өбүгэлэр көс олоххо тутта сылдьыбыт малларын туһунан биэриини өссө да киэҥ аудиторияҕа көрдөрөн кэнчээри ыччакка тарҕатар, кэпсиир наада. Ханнык баҕарар тиэмэҕэ методист үлэтэ улахан суолталаах, Вера Давыдовна билигин култуура салаатыгар методист быһыытынан үлэлии сылдьар, инникитин өссө да өбүгэбит дьарыктарын, олоҕун туһунан биэриилэри оҥоруохпут диэн эрэнэбит.

Вералыын тапсан араас устуулары оҥорбуппутун бэйэбит улаханнык сыаныылыбыт, астынабыт.          Түгэнинэн туһанан эбэҥки тылын үөрэтэ сылдьар кийииттэрбитигэр, Варвара Петровна Острельдинаҕа, Антонина Васильевна Долгуноваҕа махтанабыт.  Иккиэн ыраах Өлүөхүмэ кыргыттара буолаллар, Өлөөнү иккис дойду оҥостон, таптыыр идэлэринэн үлэлии хамсыы сылдьаллар. Өлөөҥҥө өр сылларга олорон үлэлээбит эбэҥки тылын илдьэ сылдьар Светлана Степановна Михайловаҕа. Кинилэр баар буоланнар төрүт эбэҥкибит тылынан бүгүн оҕолорбут, сиэннэрбит хоһоон ааҕаллар, ырыа ыллыыллар, араас таһымнаах куонкурустарга, кэнпириэнсийэлэргэ  кытталлар.

Надежда КОЛОДЕЗНИКОВА