Кирэдьиит оҥоһуллуон иннинэ Госуслугаҕа иһитиннэриини ыытар буолуохтара

Дьону түөкүттэртэн харыстыыр туһуттан Арассыыйа Баана РФ Сибээс, маассабай коммуникация министиэристибэтин кытта маннык иһитиннэрэр үлэни киллэрэр былааннаахтар.

Өскөтө киһи аатынан ким эрэ кирэдьиит ыла сатыыр буоллаҕына, Госуслугаҕа тус бэйэтин кэбиниэтигэр иһитиннэрии киирэр буолуоҕа. Бу туһунан Киин Баан баһылыга Эльвира Набиуллина иһитиннэрдэ.

Бу саҥа киллэрии сыала-соруга – атын киһи аатынан кирэдьиит оҥорторор түөкүттэри утары охсуһуу. Маны таһынан, эмиэ бу охсуһуу чэрчитинэн бааннар килийиэннэр тустарынан дааннайдары кирэдьиитинэй устуоруйалар бюроларыгар суһаллык биэрэн иһэллэрин эбээһинэстиэхтэрэ.