Кирэдьиит ылан, 450 тыһыынча солкуобайы ыыппыт…

Түөкүттэр ааспыт нэдиэлэҕэ өссө биэс киһиттэн уопсайа  3 мөлүйүөн солкуобай суумалаах харчыларын уорбуттар. 

Дьокуускайга олорор биэнсийэлээххэ быраабы харыстыыр уорган үлэһитин аатыттан эрийбиттэр уонна кирэдьиит ылан, 450 тыһыынча солкуобайы ыытарын ситиспиттэр.

37 саастаах дьахтарга «Киин» Баан үлэһитин аатыттан эрийэн, 400 тыһыынча солкуобайы ыыттарбыттар.

74 саастаах биэнсийэлээх дьахтарга куорат балыыһатыттан «медбрат» буолан кубулунан, 263 тыһыынча солкуобай уурдарыылааҕын суйдаан ылбыттар.

Мииринэй оройуонун олохтооҕо «домофону уларытабыт» диэн албыҥҥа киирэн биэрэн, 1 мөлүйүөн солкуобайын сүтэрбит.

Маннык албыҥҥа биэнсийэлээхтэр эрэ киирэн биэрэр буолбатахтар. Жатай 19 саастаах олохтооҕо «интим-өҥөнөн» туһаныам этэ диэн, түөкүттэргэ 768 тыһыынча солкуобайы ыыппыт. Бу туһунан ИДьМ пресс-сулууспата иһитиннэрэр.

Билбэт киһигит эрийдэҕинэ, кэпсэтэ сатаабакка, төлөпүөнү арааран кэбиһиҥ, ханнык да сигэни баттаамаҥ, СМС-куоду этимэҥ диэн сэрэтэллэр. Ордук интэриниэтинэн табаары атыылаһарга, туох эрэ өҥөнү оҥорторорго сэрэхтээх буолуҥ.