Кириһиэнньэ сөтүөтэ тохсунньу 18-20 күннэригэр буолар

Быйыл Кириһиэнньэ сөтүөтэ Дьокуускай куоракка уонна 16 оройуоҥҥа тохсунньу 18-20 күннэригэр буолуо.

Барыта 23 миэстэҕэ, ол иһигэр 15 сөтүөлүүр сир уонна уу ыларга аналлаах 8 ойбон оҥоһуллара былааннаммыт.
Өрөспүүбүлүкэ Бырабыыталыстыбатын бэрэссэдээтэлин бастакы солбуйааччы Дмитрий Садовников ыксаллаах быһыыны-майгыны сэрэтиигэ уонна баһаарынай куттал суох буолуутун хааччыйыыга хамыыһыйа мунньаҕын ыытта. Кини бу күннэргэ Дьокуускайдааҕы ыксаллаах быһыы-майгы территориальнай систиэмэтэ үрдүк бэлэмнээх эрэсииминэн үлэлииргэ бэлэмин бэрэбиэркэлээтэ.
«Кириһиэнньэ сөтүөтүн кэмигэр Дьокуускайдааҕы ыксаллаах быһыы-майгы территориальнай систиэмэтэ үрдүк бэлэмнээх эрэсииминэн үлэлиэ. Маннык тэрээһин сыл аайы үгэс быһыытынан ыытыллар. Биһиги айылҕабыт уратытын учуоттаан араас быһыыга-майгыга бэлэм буолуохпутун наада. Онон миэстэтигэр суукканы эргиччи суһал сулууспалар, ол иһигэр ЫБММ, ИДьМ, Саха сирин Быыһыыр сулууспата итиэннэ мэдиссиинэ көмөтүн биригээдэтэ дьуһуурустубалыахтара», – диэн кини эттэ.
Сөтүөлээһин кэмигэр куттал суох буолуутун 617 киһи уонна 133 тиэхиникэ хааччыйыа. Өрөспүүбүлүкэ Доруобуйаҕа харыстабылын министиэристибэтэ иһитиннэрбитинэн, оройуоннарга уонна куорат уокуруктарыгар мэдиссиинэ көмөтүн суһал биригээдэлэрэ дьуһуурунайдыахтара.
Дьокуускай куоракка Кириһиэнньэ сөтүөтэ, үгэс быһыытынан Күөх хонууга ыытыллыа, онно анаан оптуобус сылдьыа.

Маны таһынан Кириһиэнньэ сөтүөтэ Кэбээйи, Томпо, Мииринэй, Ленскэй, Алдан, Нерюнгри, Анаабыр, Аллараа Халыма, Усуйаана, Нам, Бүлүү, Өймөкөөн, Хаҥалас, Үөһээ Халыма, Абый уонна Уус Маайа оройуоннарыгар ыытыллара былааннанар.