Кириһиэнньэҕэ туох көҥүллэнэр, бобуллар?

Сарсын, тохсунньу 19 күнүгэр – Кириһиэнньэ. Бу күн туох көҥүллэнэр, бобуллар? Кириһиэнньэнэн күнү-дьылы хайдах билгэлииллэр?

Кириһиэнньэ – улахан христианскай бырааһынньык, онон итэҕэллээх дьон бу күн булгуччу Таҥара дьиэтигэр сылдьаллар.

Биир сүрүн үгэс – сибэтиэй ууну ылыы. Бу ууну сыл устата уура сылдьан тутталлар, дьиэни-уоту ыраастыыллар, оннооҕор ыарыыларын, дьарҕаларын кытта эмтэнэллэр.

Бу күн уу эрэ буолбакка хаар эмиэ эмтиир күүстээх диэн итэҕэйэллэр, доруобай, кэрэ сэбэрэлээх буолаары сирэйдэрин, илиилэрин хаарынан соттоллор.

Төһө даҕаны Кириһиэнньэ тоһуттар тымныыта турдар, дьиэлэриттэн туох баар куһаҕаны үргүтээри, үчүгэйи киллэрээри бу күн дьиэлэрин аанын, түннүгүн тэлэччи аһаллар эбит.

Бу күн сыбааттаһар эбэтэр тапталга билинэр үчүгэйгэ дииллэр.

Атын даҕаны таҥара бырааһынньыктарыгар курдук Кириһиэнньэҕэ этиһэр, кыыһырсар, хобу-сиби таһар, кэпсиир, дьону холуннарар көҥүллэммэт.

Бу күн таҥас сууйар букатын көҥүллэммэт. Кириһиэнньэҕэ уу төһө да ураты ыраас диэтэллэр, таҥас сууйуутун курдук бытархайга ууну барыыры аньыынан ааҕаллар.

Былыргы итэҕэлинэн бу күн ытааһын куһаҕаны түүйэр. Кириһиэнньэҕэ ытаабыттар сылы быһа ытыыллар диэн этэллэр эбит, онон харах уутун таһаарар букатын табыллыбат.

Кириһиэнньэ күн үлэлээмэҥ диэн сүбэлииллэр.

Күн-дьыл билгэтэ

Өскөтүн чэчиэринньиккэ ый толору буоллаҕына – саас уу кэлиэҕэ. Ый саҥа үүнэр буоллаҕына – чугастааҕы ыйга Кириһиэнньэ тымныыта туруоҕа.

Бырааһынньык иннинээҕи түүн былыта суох, тымныы буоллаҕына – сайына ардаҕа суох, кураан.

Былыттаах уонна тымныы – үрдүк үүнүүнү ылыаҥ.

Түүнэ сулустаах – тэллэй хойуутук үүнүөҕэ.

Кириһиэнньэ күн күннээх – кураан сайыҥҥа.