Маасканы кэтиҥ

Доруобуйа харыстабылын министиэристибэтэ иһитиннэрбитинэн, 2023 сыл 46 нэдиэлэтинэн — сэтинньи 13-19  күннэринээҕи түмүгүнэн, өрөспүүбүлүкэҕэ 9 364 киһи тымныйан ыалдьыбыта (ОРВИ) бэлиэтэнэр.

Ити ааспыт нэдиэлэттэн 20,5% үрдүк. Ордук 7-14 саастаах оҕолор тымныйбыттар (ОРВИ).

Лабораторнай кэтээн көрүү чахчытынан, өрөспүүбүлүкэҕэ А/H3N2 кириип бэлиэтэнэр.

Өрөспүүбүлүкэҕэ кирииби утары быһыыны биэрии салҕанар. Бүгүҥҥү иһитиннэриинэн, кирииби утары быһыыны 447 510 киһи ылбыт. Ол иһигэр 131 650 оҕо, 315 860 улахан киһи.

Дьаҥтан харыстанар туһугар СӨ Доруобуйа харыстабылын министиэристибэтэ сүбэлиир:

Кирииби утары вакцинаны ыларга;

— Элбэх киһи мустар сиригэр, иһирдьэ сылдьар буоллаххытына мааскаланыҥ (атыы-эргиэн кииннэригэр, бааннарга, киинэ тыйаатырдарыгар, оптуобустарга, уо.д.а.);

— Элбэх киһи мустар сиригэр сылдьаргытын аҕыйатыҥ;

— Айаххытын, муруҥҥутун, хараххытын илиигитинэн тыытымаҥ;

— Илиигитин мыыланан, дезинфекциялыыр сириэстибэнэн сууна-сотто сылдьыҥ;

— Уопсастыбаннай миэстэлэргэ бэйэ икки ардыгар 1,5-2 м курдук тэйиччи буолууну тутуһуҥ;

— Тулалыыр дьоҥҥутугар сыһыарбат уонна дьаҥҥа сыстыбат туһугар ытырдарга, сөтөллөргө биирдэ туттуллар салпыакканы туһаныҥ; ыарытыйдаххытына бэйэҕит эмтэнимэҥ, дьиэҕитигэр сытан бырааһы ыҥырыҥ.

СӨ Ил Дарханын уонна Бырабыыталыстыбатын пресс-сулууспата

Хаартыскаҕа Андрей Сорокин түһэриитэ