Кирилл Бычков байыастарга бэлэхтэри туттарда

Бырабыыталыстыба бэрэссэдээтэлэ Кирилл Бычков  Саха сириттэн сылдьар, Бэһис аармыйа разведкалыыр батальонугар сулууспалыыр  байыастары кытта көрүстэ.  Кини наадалаах тэриллэри, дизельнэй станциялары уонна генератордары тиэртэ. Бырабыыталыстыба бэрэссэдээтэлэ ити барыта тирэх пууннарынан тиэрдиллэрин бэлиэтээтэ.

Кирилл Бычков көрсүһүү кэмигэр байыаннай сулууспалаахтары кытта кэпсэттэ. Байыастар Саха сириттэн кэлэр  өйөбүл иһин махтаннылар, сулууспаларын туһунан кэпсээтилэр, төрөөбүт өрөспүүбүлүкэлэригэр эҕэрдэлэрин ыыттылар.

“Дойдуларыгар төннөн кэлэн, үлэлиир-хамсыыр  инники былааннарын сиһилии ырыттыбыт, кинилэри үлэнэн хааччыйыыга уонна дьоруойдуу быһыыларыгар сөптөөх дьиэ-уот боппуруостарын быһаарарга туох үлэни ыытарбытын кэпсээтибит”, — диэн Саха сирин бырабыыталыстыбатын бэрэссэдээтэлэ тоһоҕолоон бэлиэтээтэ.

Көрсүһүү кэмигэр кини  Аҕа дойду Улуу сэриитигэр Кыайыы 80 сылыгар ананан хомуллубут бырааһынньыктааҕы бакыаттары байыастарга туттарда.