Кирилл Бычков: «Норуот сомоҕолоһуутун күнэ ураты суолталаах»

Бүгүн, сэтинньи 4 күнүгэр, СӨ Бырабыыталыстыбатын бэрэссэдээтэлэ Кирилл Бычков Норуот сомоҕолоһуутун күнүгэр анаммыт «Доҕордоһууну, Эйэни, Арассыыйаны алгыыбыт!» бырааһынньыктааҕы кэнсиэр кыттыылаахтарын А.Е. Кулаковскай аатынан Норуоттар доҕордоһууларын дьиэтигэр эҕэрдэлээтэ.

Саха сирин премьерэ бэлиэтээбитинэн, бу бырааһынньык Арассыыйа  олохтоохторугар ураты суолталаах, сомоҕолоһуу, эйэҕэ уонна бэйэ-бэйэни өйдөһүүгэ дьулуур бэлиэтинэн буолар. Ол биһиги норуоппут сүрүн сиэр-майгы сыаннастарын – патриотизмы, түмсүүлээх буолууну, сомоҕолоһууну көрдөрөр.

«Биһиги Арассыыйабыт киэҥ сиригэр-уотугар үйэлэр тухары эйэлээхтик олорор элбэх норуоттар уонна омуктар үгэстэрин түмтэ. Саха сиригэр эрэ 130-тан тахса омук бэрэстэбиитэлэ олорор уонна үлэлиир. Бу сомоҕолоһуу уонна түмсүүлээх буолуу кыахтаах уонна күүстээх дойдуну тутарга, өстөөҕү утары турунарга, Ийэ дойдубутун көмүскүүргэ, ураты үгэстэри уонна баай култуураны харыстыырга көмөлөһөр», — диэн Кирилл Бычков эттэ.

Кини эбэн эппитинэн, быйыл Норуот сомоҕолоһуутун күнэ 2005 сыллаахха официальнайдык сөргүтүллүбүтүн кэннэ 20-с төгүлүн бэлиэтэнэр. Бу күн Арассыыйа дьоно-сэргэтэ Ийэ дойдубут устуоруйатын ыарахан кэмнэригэр өбүгэлэрбит көрдөрбүт хорсун быһыыларын махталынан ахталлар. Бу бырааһынньык норуот сомоҕолоһуутун, түмсүүлээх буолуутун уонна биир дойдулаахтарбыт улуу дьыалаларынан киэн туттууну бэлиэтиир. Бырааһынньыктааҕы тэрээһиҥҥэ байыаннай дьайыы бэтэрээннэрэ, норуот дьокутааттара, Саха сирин уопсастыбаннай, ыччат уонна национальнай-култуурунай түмсүүлэрин бэрэстэбиитэллэрэ кытыннылар. Сиһилии: https://www.sakha.gov.ru/news/14890/