Кирилл Бычков: «Саҥа чөмпүйүөннэр «Азия оҕолоро» оонньуулартан умнуллубат саҕалааһыны ылыахтара»

СӨ Бырабыыталыстыбатыгар бүгүн, бэс ыйын 3 күнүгэр, «Азия оҕолоро» VIII оонньууларыгар бэлэмнэнии туһунан Координационнай киин мунньаҕын СӨ премьер-миниистирэ Кирилл Бычков  ыытта.

-«Азия оҕолоро» тэрээһинэ ыытыллара олох кыра кэм хаалла. Маннык таһымнаах тэрээһини ыытыы бары эйгэни, салааны таарыйар. СӨ Бырабыыталыстыбатын чилиэннэрэ бары оонньууларга бэлэмнэниигэ кыттыыны ылаллар. Успуорт оонньуулар дойду үрдүнэн саамай үрдүк таһымнаах тэрээһин буолар. Оонньууларга бэлэмнэнии былаан быһыытынан баран иһэр, — диэтэ Кирилл Бычков.

Кини этэринэн, сүрүн үлэ оонньуулар ыытыллыахтаах эбийиэктэрин бэлэмнээһиҥҥэ, кыттыылаахтары уонна ыалдьыттары аһатыыга, олохтооһуҥҥа туһуланар. Бэс ыйын 1 күнүгэр эбийиэктэр төһө бэлэмнэрин бэрэбиэркэлээбиттэр. Ол курдук эбийиэктэр 100% бэлэмнэр.

Кирилл Бычков этэринэн, Ил Дархан Айсен Николаев сүрүн болҕомтону оонньуулары ыытыыга баһаарынай уонна антитеррористическай өттүнэн сэрэхтээх буолуу бары миэрэлэрин тутуһууга уурарын эттэ.

«Бүгүҥҥү күҥҥэ «Азия оҕолоро» оонньуулары умнуллубат, үрдүк таһымнаах, кыттааччыларга уонна ыалдьыттарга табыгастаах, умнуллубат гына тэрийиигэ тэрийээччилэр бары күүстэрин уураллар. Оонньуулар чөмпүйүөннэрэ успуорт эйгэтигэр умнуллубат түгэни ылалларыгар уонна биһиги оонньууларбытыгар кыттан, спортсмен быһыытынан карьералара тахсарыгар баҕарабыт», — диэтэ.

Норуоттар икки ардыларынааҕы «Азия оҕолоро» оонньуулар Дьокуускайга бэс ыйын 25 күнүттэн от ыйын 7  күнүгэр диэри ыытыллыахтара.