Кирилл Бычков СӨ ИДьМ кэллиэгийэтин мунньаҕар кытынна

Бүгүн Саха Өрөспүүбүлүкэтин Бырабыыталыстыбатын Бэрэссэдээтэлэ Кирилл Бычков Саха Өрөспүүбүлүкэтин ИДьМ кэллиэгийэтин мунньаҕар кытынна. Мунньахха ааспыт сыл үлэтин түмүктэрин таһаардылар уонна инники соруктары торумнаатылар.

Кирилл Бычков ИДьМ үлэһиттэригэр махтанна, өрөспүүбүлүкэ туруктаах уонна куттал суох буолуутун хааччыйыыга полиция үлэһиттэрэ улахан оруоллаахтарын тоһоҕолоон бэлиэтээтэ. Кини түбүктээх үлэ үтүө түмүгүн сөптөөхтүк сыаналыырга уонна салгыы сайдар хайысхалары быһаарарга кыах биэрэрин бэлиэтээтэ, дьон бырааптарын көмүскээһин, буруйу оҥорууну утары охсуһуу, уопсастыбаннай бэрээдэги көрүү иһин махталын биллэрдэ. Өрөспүүбүлүкэ Бырабыыталыстыбатын Бэрэссэдээтэлэ анал байыаннай дьайыы кэмигэр уонна тастан ыгыы-түүрүү баарын да үрдүнэн, бары быраабы харыстыыр уорганнар үлэлэрэ ураты суолтаны ыларын эттэ. Кини 2025 сылга сүрүн соруктартан биирдэстэринэн анал байыаннай дьайыыга бары өттүнэн өйөөһүн буоларын ыйда. Өрөспүүбүлүкэҕэ фроҥҥа көмөлөһүү тиһиктээхтик ыытылларын, бородууксуйа оҥоруута тэриллибитин, эбии сэрии сэбин уонна гуманитарнай таһаҕастары тохтоло суох тиэрдии хааччыллыбытын, ДНР Докучаевскай куоратын инфраструктуратын чөлүгэр түһэрии уонна олохтоохторугар көмө оҥоруу үлэлэрэ салҕаналларын кэпсээтэ.

Кирилл Бычков Саха сиригэр анал байыаннай эпэрээссийэ кыттыылаахтарын уонна кинилэр дьиэ кэргэттэрин өйүүр кэлим дьаһаллар үлэлииллэрин бэлиэтээтэ. Демобилизация кэнниттэн байыаннай сулууспалаахтары социальнай адаптацияҕа, чөлгө түһэриигэ, үлэҕэ киллэриигэ уонна саҥаттан үөрэтиигэ тиһиктээх үлэ тэриллибитин эттэ. Кини уон икки саха буойуна Арассыыйа Дьоруойа үрдүк аакка тиксибитин, элбэх байыас байыаннай уордьаннарынан уонна мэтээллэринэн наҕараадаламмыттарын санатта, кинилэр байыаннай сатабыллара араас салааларга туттуллуохтарын бэлиэтээтэ.

Мунньах кэмигэр бииргэ үлэлээһин үчүгэй түмктээҕин бэлиэтээтилэр. 2025 сылга быраабы араҥаччылыырга координационнай мунньах, буруйу оҥорууну сэрэтэр биэдэмистибэлэр икки ардыларынааҕы хамыыһыйа, наркотигы эргиниини утары охсуһар өрөспүүбүлүкэтээҕи хамыыһыйа уонна да атын сүбэ-ама биэрэр уорганнар чэрчилэринэн олоххо киирбит. Былырыын «Саха Өрөспүүбүлүкэтигэр буруйу оҥорууну сэрэтии» судаарыстыбаннай бырагырааманан 77,5 мөлүйүөн солкуобай көрүллүбүт, ол иһигэр 14 муниципальнай оройуоҥҥа 32 көҥүл уопсастыбаннай патруллары өйөөһүҥҥэ. Кинилэр кыттыыларынан 1300-тэн тахса бэрээдэги кэһии быһаарыллыбыт, бу 2024 сыллааҕы көрдөрүүттэн 20 бырыһыан элбэх. Ону тэҥэ «Куттала суох куорат» систиэмэни сайыннарыыга, СМИ уонна социальнай ситим нөҥүө дьоҥҥо-сэргэҕэ иһитиннэриигэ, тэлэбиидэнньэҕэ тиэмэлээх биэриилэри тэрийиигэ дьаһаллар олоххо киирбиттэр.

Сиһилии: https://www.sakha.gov.ru/news/19309