Хаартыска: sakha.gov.ru
Бу сыл тохсунньу 1 күнүттэн Саха сиригэр 1 киилэ үүтү туттарыыга субсидия 60-тан 65 солк. диэри улааппыта. Ону сэргэ хаһаайыстыбалаах ыалларга ынах сүөһү төбөтүгэр субсидия сылга 37-тэн 39 тыһ. солк., оттон Арктика оройуоннарыгар 45 тыһ. солк. диэри үрдээбитэ. Саха сиригэр барыта 2024 сылга 54,9 тыһыынча туоннаттан тахса үүтү туталлара былааннанар.
Бу туһунан Саха сирин Бырабыыталыстыбатын бэрэссэдээтэлэ Кирилл Бычков Эбээн Бытантай улууһугар «Саха сүөһүтэ» генофонднай хааһыналаах тэрилтэ «Саккырыыр» уонна «Кустуур» отделениеларын үлэһиттэрин кытары көрсүһүүгэ иһитиннэрдэ.
«Ил Дархан Айсен Николаев сорудаҕынан, 2024 сылга тыа хаһаайыстыбатын бородууксуйатын сайыннарыы судаарыстыбаннай бырагыраама үбүлээһинэ 500 мөл. солк. улааппыта. Саха сирин бүддьүөтүттэн тыа хаһаайыстыбатын судаарыстыбаннай өйөбүлэ 14,9 млрд солк. тиийдэ», — диэн Кирилл Бычков бэлиэтээтэ.
Судаарыстыбаннай бырагырааманы үбүлээһинин аҥаарыттан ордуга, 7,7 млрд солк., сүөһүнү, сылгыны, хотугу дьиэ табатын иитиитин өйөбүлүгэр, улуустарынан бородууксуйаны оҥорон таһаарыыны хааччыйыыга көрүллүбүтэ. Үрүҥ аһы оҥорон таһаарааччылары өйөөһүҥҥэ туспа болҕомто ууруллубута. Кинилэргэ үүтү оҥорон таһаарыыга туспа субвенциялар, СӨ Тыатын хаһаайыстыбатын министиэристибэтин граннара бэриллэллэр.
«Бу күннэргэ бырабыыталыстыба аадырыһыгар үүтү оҥорооччулартан субвенцияны кэмигэр тириэрдии туһунан ыйытыктар киирдилэр. Үүтү соҕотуопкалааһыҥҥа Саха сирин бырабыыталыстыбата 2024 сылга 3,5 млрд солк. тахса үбү-харчыны ыытар. Бу сыалга муус устар 8 күнүнээҕи туругунан муниципальнай улуустарынан уонна куораттааҕы уокуруктарынан 892,5 мөл. солк. тиэрдилиннэ. Итинтэн билигин 235,2 мөл. солк., эбэтэр 26,4% туһанылынна», — диэн Кирилл Бычков кэпсээтэ.
Кини муниципальнай улуустарынан уонна куорат уокуруктарынан көрүллүбүт үбү-харчыны кэмигэр тиэрдиллибэт төрүөтүнэн бу сылга үбүлээһин бэрээдэгин бигэргэтэр олохтоох нуормалыыр-быраап аахталара оҥоһуллубатахтарын ыйда.
«Бу кэмҥэ улуустарынан үбүлээһин бэрээдэгин бигэргэтэр туһунан нуормалыыр-быраап аахталарын оҥоруу үлэтэ түмүктэнэр, субсидияны ылааччыларга биллэриллэр. Субсидияны ылааччылары быһаарыы, ону тэҥэ улуустарынан үбү-харчыны туһаҕа таһаарыыга сөбүлэһиилэри түһэрсии муус устар иккис аҥаарыгар былааннанар», – диэн бэлиэтээтэ Кирилл Бычков.
Туттарыллыбыт үүт харчытыгар субсидия төлөбүрдэрин туһунан ордук сиһилии иһитиннэриини Кирилл Бычков бэйэтин официальнай ТГ-ханаалыгар таһаарда https://t.me/kirill_bychkov_yakutia/1410.
Санатан эттэххэ, Саха сирэ дойду үрдүнэн тыа хаһаайыстыбатынан дьарыктанааччылар дьон ахсаанынан иккис миэстэни ылар.
СӨ Ил Дарханын уонна Бырабыыталыстыбатын пресс-сулууспата
Өрөспүүбүлүкэ сиригэр-уотугар халаан туругун ыам ыйын 18 күнүгэр ыксаллаах балаһыанньаны сэрэтиигэ уонна туоратыыга хамыыһыйа мунньаҕар…
Халаан уутуттан эмсэҕэлиир нэһилиэктэр ахсааннарыгар урут хаһан да киирбэтэх Хатырык нэһилиэгэ улахан ууга ылларан, олохтоохтору…
Ыам ыйын 17 күнүгэр Нам улууһугар «Библионочь-2024» Бүтүн Арассыыйатааҕы аахсыйа Арассыыйаҕа Дьиэ кэргэн сылын чэрчитинэн…
Бүгүн, ыам ыйын 18 күнүгэр, Аан дойду үрдүнэн Түмэл күнэ бэлиэтэнэр. Бу күнү көрсө Амматааҕы…
Эми-тому атыылаһан баран, аны хайдах иһэр туһунан ыйыыны-кэрдиини (инструкцияны) төһө билсэбитий? «Күҥҥэ үстэ биир табылыакканы…
Саха сиригэр физическэй култуура уонна успуорт сайдыытыгар, хаачыстыба өттүнэн үрдүк кэрдиискэ тахсарыгар кылгас олоҕун анаабыт…