Кировскай куоракка ИТ-кииҥҥэ 100 оҕо үөрэҕи аастылар

Бастакы үөрэх сылыгар Ил Дархан Айсен Николаев сорудаҕынан ДНӨ Кировскай куоракка аһыллыбыт IT-кииҥҥэ  шефтэһии бырагырааматын чэрчитинэн 100 оҕо үөрэҕи аастылар. Бу туһунан Саха сирин Ил Дарханын уонна Бырабыыталыстыбатын пресс-сулууспата иһитиннэрэр.

Кировскайдааҕы 2 №-дээх орто оскуола баазатыгар аһыллыбыт ИТ-киин Донбас үрдүнэн маннык хабааннаах бастакы тэрилтэнэн буолар. Манна оҕолор эрэ буолбакка,  чугастааҕы нэһилиэнньэлээх пууннартан улахан дьон эмиэ үөрэнэллэр. 2 №-дээх оскуола дириэктэрэ Ольга Цюпка бэлиэтээбитинэн, киин иһинэн үөрэх ыытарга бары усулуобуйа баар.

Санаттахха, Ольга Цюпка үөрэнэр оҕолору кытта Саха сиригэр соторутааҕыта Саха сиригэр Арассыыйа Бэрэсидьиэнэ Владимир Путин оробуочай командировкатын кэмигэр сибээскэ тахсыбыттара. Үөрэнээччи Георгий Скляр быһа сибээс кэмигэр 3d-моделированиеҕа дьарык хайдах ыытылларын туһунан кэпсээбитэ. Кини этэринэн, үгүс оҕолор инникитин идэлэрин ИТ эйгэтин кытта сибээстииргэ  санаммыттар. Судаарыстыба баһылыга оҕолорго ситиһиилэри баҕарбыта уонна үрдүк технологиялар сайдыылара дойду үрдүнэн, Арассыыйа саҥа эрэгийиэннэрин киллэрэн туран, олус үчүгэй түмүктэри көрдөрөрүгэр эрэнэрин биллэрбитэ.