Кировскайга харах балыыһатын филиала аһыллыа

Донецкай Норуодунай Өрөспүүбүлүкэтин Кировскай куоратыгар Дьокуускайдааҕы офтальмологическай балыыһа филиала аһыллан, бэс ыйын 30 күнүттэн үлэтин саҕалыаҕа.

2022 сыл сааһыгар Саха сирэ Кировскай куораты кытта “шефтэһэр” туһунан дуогабардаспыта. Бу кэмтэн харах быраастарын биригээдэтэ хаста да Донецкайга баран, үлэлээн кэлбиттэрэ. Олохтоохтор харах быраастарыгар улаханнык наадыйаллар.

“Саха сирин быраастара 800-тэн тахса эпэрээссийэни оҥорон, сүүһүнэн дьон көрөрүн быыһаатылар. Биһиэхэ сүрүн түмүкпүт – дьон ис сүрэҕиттэн махтанара. Бу дьыала салҕаммытыттан үөрэбин”, — диэн Айсен Николаев “Телеграм” ханаалыгар суруйда.

Офтальмологтар бэс ыйын 30 күнүттэн филиалга үлэлээн саҕалыахтара. Билигин номнуо анал тэриллэрин (микроскоптары, лаампалары, факокомбайннары) аҕалан туруордулар. Офтальмологическай балыыһа кылаабынай бырааһа Иван Луцкан этэринэн, филиал арыллыыта Кировскай олохтоохторугар эрэ буолбакка, ДНӨ илиҥҥи өттүнээҕи нэһилиэнньэҕэ улахан көмөлөөх буолуоҕа диэн СИА суруйар.