Клещ ытырбытыттан Арассыыйа чөмпүйүөҥкэтэ өлбүт

 Мууска хаҥкынан хатааһылааһын Арассыыйа чөмпүйүөҥкэтэ Алена Власова клещ ытырбытыттан сылтаан өллө.

35 саастаах спортсменканы бу сайын доҕотторун даачатыгар сынньана сырыттахтарына клещ ытырбыт. Сарсыныгар кыыс балыыһаҕа баран көрдөрүммүт, хомойуох иһин, ыарыылаах клещ буолан биэрбит. Спортсменка энцефалитынан ыалдьыбыт, салгыы ыарыыта эбии сэтэрээн барбыт.

Үс ый устата Алена ИВЛ-га холбонон тыына сыппыт, тыҥата 70% бүппүт эбит.

Алена алтынньы 5 күнүгэр өлбүт, кэргэнэ, 12 саастаах кыыһа хаалбыттар.

Саха сиригэр клещ өтөн киириитэ сылтан сыл элбээн иһэр, томороон тымныыбыт да бохсубат буолла. Онон кутталлаах үөнү өлөрөр эми-тому эрдэттэн хааччына сылдьыахха наада.