Климент Иванов: «Быыбар чиэһинэйдик барыаҕа диэн эрэнэбин»

Көмүс күһүммүтүн кытары быйылгы быыбарбыт бу тиийэн кэллэ. Быйылгы тэрээһиҥҥэ кыттаары сылдьар дьон санааларын ааһан, бастаан хайдах-туох быыбардаабыттарын ыйыталастыбыт.

Климент Иванов, СӨ Бочуоттаах олохтооҕо, уопсастыбаннай диэйэтэл:

– Мин аан бастаан училищеҕа үөрэнэ сылдьан, 1955 с. быыбарга кыттыбытым. Ол кэмҥэ бастакы быыбардааччыларга улахан болҕомто ууруллара. Быыбар диэн тугун-хайдаҕын туһунан араас бэсиэдэлэри ыыталлара. Быыбар туһунан хаһыакка эмиэ күүскэ сырдаталлара. Мин аан бастаан быыбарга кытта тиийбиппэр, «Социалистическая Якутия» хаһыат кэрэспэдьиэнэ түбэһэ түһэн, маҥнайгы быыбардааччы диэн таһааран, кулун тутарга хаһыакка тахсан турабын, ол кэмҥэ эриэккэс түбэлтэ этэ.

Райкомҥа үлэлии сылдьаммын быыбар хампаанньатын тэрийээччи буолбутум. Ол кэмҥэ быыбар иннинээҕи аҕытаассы­йаны ыччаттар ыыталлар этэ.

Быыбар буолар түүн кэнсиэр, үҥкүү-битии, оһуокай бөҕө буолара, ол кэннэ үргүлдьү, сарсыарда 6 чаас кэннэ быыбарга бараллара. Мин 1970-с сыллар саҥаларыгар Абый улууһун Уолбут сэлиэнньэтигэр райком сэкэритээринэн үлэлии сырыттахпына, 60-тан тахса киһи, быыбарга 20 мүнүүтэ иһигэр куоластаан өрөспүүбүлүкэҕэ биллэн турар.

Быйылгы быыбарга кими Ил Дарханынан, кими норуот дьокутаатынан  таларбыт Сахабыт сирин сайдыытыгар улахан суолталаах. Онон дьон дириҥник толкуй­даан, өрөспүүбүлүкэ дьылҕатын быһаарыы буоларын өйдүөхтээхтэр. Чиэһинэй быыбар барыа, күүстээхтэн күүстээх, дьон-сэргэ итэҕэлин ылбыт эрэ дьон талыллыа диэн эрэнэбин.