Клубника, арбуз уонна цитрус амтаннаах быырпах атыыга таҕыста

Ньурбаҕа «Байар» кээпэрэтиип өссө биир сонун бородууксуйатын — амтаннаах быырпаҕы атыыга таһаарда. Бу туһунан «Ньурба» хаһыата ТХ-ханаала суруйар.

Ыам ыйын 18 күнүгэр «Смак маркет» маҕаһыыҥҥа дегустация буолан ааста. Клубника, арбуз уонна цитрус амтаннаах быырпаҕы дьон сөбүлээтэ, үгүстэрэ тута миэстэтиттэн атыылаһан бардылар.

«Аныгы кэми кытары тэҥҥэ хардыылыыбыт. Билигин оҕолор аҕалыы «Милкис» гаастаах утаҕы сөбүлээн иһэллэр. Биһиги быырпахпыт амтана онно майгынныыр. Суоратынан оҥоробут, онон ким баҕарар иһиэн сөп»,- диэн этэр «Байар» кээпэрэтиип салайааччыта Надежда Филиппова. Соторутааҕыта «Байардар» хатарыллыбыт суорат оҥорон эмиэ соһуппуттара. Билигин онно докумуон үлэтэ оҥоһуллар. Өссө тугунан соһуталлар?

Лена Петрова, «Ньурба» хаһыата