Колесов уонна Прокопьева – дуобакка классическай бырагыраамаҕа өрөспүүбүлүкэ чөмпүйүөннэрэ!

Дьокуускай куоракка эр дьон уонна дьахталлар икки ардыларыгар классическай бырагырааманан сүүс харахтаах дуобакка өрөспүүбүлүкэ чөмпүйэнээтэ буолан ааста диэн СӨ Физкултуураҕа уонна маассабай успуорка управлениета иһитиннэрэр.

Бүтэһик тохсус турга күүстээх киирсиигэ, бириистээх миэстэлэри үллэстии быһаарар суолталаах буолла. Бастакы дуоскаҕа Гаврил Колесов Вадим Фёдорову, иккис дуоскаҕа Николай Гуляев Сандал Стручкову кыайда. Прокопий Говоров Глеб Борисовы кыайан үһүс миэстэни ылла.

Колесов уонна Гуляев турниры тэҥ ахсааннаах түмүктээбиттэринэн, эбии 5+3 систиэмэнэн (түргэн дуобакка) оонньуу ыытылынна. Быһаарар партияҕа Гаврил Колесов кыайыыны ситиһэн Саха сирин чөмпүйүөнэ буолла. Үһүс миэстэни Говоров Валерий Хориннааҕар ордук коэффициеннэринэн ылла, кини эмиэ интэриэһинэй оонньууну көрдөрдө.

Дьахталлар турнирдарыгар эмиэ күүстээх күрэстэһии барда. Бастакы дуоскаҕа Айыына Прокопьева Нарыйаана Ощепкованы кыайда. Иккис дуоскаҕа Тунаара Фёдорова Алина Степанованы баһыйа тутта.

Тэҥ ахсааннаах буолан бастакы миэстэ эбии көрдөрүүлэринэн быһаарылынна. Коэффициеннэринэн чөмпүйүөн титулун Айыына Прокопьева ылла. Айыына Протопопова Альбина Колодезниковалыын тэҥнэһэн үһүс миэстэни таҕыста.

Бириистээх миэстэлэр түмүктэрэ:

Эр дьоҥҥо:

• 1 м – Гаврил Колесов – Саха Өрөспүүбүлүкэтин чөмпүйүөнэ.
• 2 м – Николай Гуляев – үрүҥ көмүс призер.
• 3 м – Прокопий Говоров – боруонса призер.

Дьахталлар:

• 1 м – Айыына Прокопьева – Саха Өрөспүүбүлүкэтин чөмпүйүөнэ.
• 2 м – Тунаара Фёдорова – үрүҥ көмүс призер.
• 3 м – Айыына Протопопова – боруонса призер.