Колыманалаах Ломоносов үһүс оҕолорун күүтэллэр дуо?

Колымана уонна Ломоносов үрүҥ эһэлэр дьиэ кэргэттэрин эбиллии күүтэр быһыылаах диэн «Орто Дойду» зоопарка үлэһиттэрэ СИА-ҕа иһитиннэрбиттэр.

Колымана бастакы оҕотун Хаарчаананы 2016 сыллаахха оҕоломмута, онтон үс сыл буолан баран Алмааһы төрөппүтэ. Эһэчээннэр билигин Ленинградтааҕы зоопаркаҕа уонна Хабаровскайдааҕы зоосаакка бааллар.

«Колымана Алмааһы төрөппүтүттэн ыла үс сыл ааста. Бу ахсынньыга кини тутта-хапта сылдьара уларыйбытын бэлиэтии көрдүбүт, арҕахха сытар, улаханнык хамсаныан баҕарбат. Күн аайы кэтээн көрөбүт. Ломоносов бэйэтин вольерыгар баар», — диэн СИА-ҕа зоопарка научнай-сырдатар салаатын сэбиэдиссэйэ Наталья Сафонова уонна зоопарка дириэктэрэ Лука Сафонов иһитиннэрэллэр.