Координационнай киин эбии пууннары үлэлэтиэҕэ

Москваҕа баар Саха сирин бастайааннай бэрэстэбиитэлистибэтин биир кэлим координационнай киинэ байыаннай эпэрээссийэ чэрчитинэн атын эрэгийиэннэргэ көмө оҥорор өйөбүл пууннары арыйан эрэр.

Бу пууннар Саха сириттэн тиийэр таһаҕаһы байыаннай эпэрээссийэ зонатыгар тиэрдиэхтэрэ. Ол курдук бастакы пууннар Ростовскай уобаласка уонна Крым Өрөспүүбүлүкэтигэр арыллыахтара. Кинилэр сүрүн соруктарынан, байыаннай чаастары, госпиталлары кытта ыкса үлэлэһии буолар. Ону сэргэ Саха сириттэн сулууспалыы сылдьар дьоҥҥо бородууктаны, малы-салы тиэрдиэхтэрэ. Үлэ нуучча гуманитарнай миссиятын кытта кыттыгас тэриллиэҕэ. Кэмиэрчэскэйэ суох тэрилтэ гуманитарнай көхтөөх үлэҕэ уонна логистическай соруктары быһаарыыга, байыаннай дьайыылар буолуталыыр сирдэригэр маннык үлэни ыытыыга уопуттаах. Ол курдук ДНӨ, ЛНӨ кытта үлэлэһиигэ эмиэ кыттыгастаах. Биир кэлим координационнай кииҥҥэ иһитиннэрбиттэринэн, маннык пууннар Саха сириттэн тиийбит таһаҕаһы тиэрдиигэ, харайыыга сүрүн тэрилтэлэр буолуохтара. Подразделение хамандыырдарын, сулууспалыы сылдьар дьон аймахтарын кытта сибээһи тутууга үлэлэһиэхтэрэ. Бэлиэтээн эттэххэ, биир кэлим координационнай киин алтынньы 14 күнүгэр СӨ Ил Дархана Айсен Николаев быһаарыытынан, байыаннай сулууспаҕа сылдьар дьоммутугар, кинилэр дьиэ кэргэттэригэр көмө оҥорор туһуттан тэриллибитэ.