КОРКИН ТУРНИРА: Бастыҥ тустуук үрүҥ көмүс борцовканан наҕараадаланыаҕа

Бүгүҥҥүттэн Дьокуускайга «Өрөгөй» успуорт комплексыгар көҥүл тустууга Дмитрий Коркин кэриэһигэр ыытыллар норуоттар икки ардыларынааҕы турнир саҕаланна. Манна 13 дойдуттан 190 тустуук кытта кэллэ.

Турнирга аан дойду чөмпүйүөннэрэ Ахмед Усманов, Абасгаджи Магомедов, призер Евгений Жербаев, Олимпиада кыттыылаахтара Эрназар Акматалиев, Виктор Рассадин, Саха сирин тустууга оскуолатын бастыҥ иитиллээччилэрэ Лев Павлов, Виктор Яковлев, Константин Капрынов, Олег Фомин уо.д.а. туста сылдьалларын СӨ Сүүмэрдэммит хамаандаларын бэлэмниир киин салайааччыта Михаил Пахомов СИА-ҕа иһитиннэрбитэ.

Кыайыылаахтар ураты оҥоһуулаах мэтээллэринэн, харчынан, чөмпүйүөннэр куубактарынан наҕараадаланыахтара. Оттон турнир бастыҥ тустуугун сүгүрүйээччилэр талыахтара, киниэхэ үрүҥ көмүстэн кутуллан оҥоһуллубут борцовканы туттарыахтара.

Бүгүн финалга тахсар иһин киирсиилэр буолуохтара, сарсын 18 чаастан финаллар ыытыллыахтара.

Хапсыһыылары быһа эпииргэ көрүөххэ сөп.