КОРКИН ТУРНИРА: Саха сирин хамаандатыгар бастакы мэтээли Андриан Ленскэй аҕалла

Дьокуускайга «Өрөгөй» успуорт комплексыгар Дмитрий Коркин кэриэһигэр көҥүл тустууга норуоттар икки ардыларынааҕы турнир ыытылла турар.  Саха сирин сүүмэрдэммит хамаандатыгар Андриан Ленскэй бастакы мэтээли — боруонса мэтээли аҕалла.

Андриан Ленскэй 86 киилэҕэ диэри ыйааһыҥҥа туһунна. Боруонса иһин киирсиигэ кини Азияҕа бастыыр иһин күрэхтэһии кыайыылааҕа, Монголия чөмпүйүөнэ Батилгун Наадамбаты кытта туһунна.

Өрө күүрүүлээх хапсыһыыга бастаан Монголия тустууга ахсаанынан кыайан испитэ. Онтон бүтэһик мүнүүтэлэргэ Андриан баһылаан, боруонса мэтээл хаһаайына буолары ситистэ.

Билигин успуорт комплексыгар боруонса иһин киирсиилэр буола тураллар. Киэһэ 18 чаастан финаллааҕы хапсыһыылар саҕаланыахтара. Манна Саха сирин көҥүл тустууга оскуолатын бастыҥ иитиллээччилэрэ — Лев Павлов (57 киилэҕэ), Александр Авелов (61 киилэҕэ), Константин Капрынов (70 киилэҕэ) уонна Виктор Рассадин (74 киилэҕэ) кыттыахтара.