Коркин турнирын көмүс мэтээлин Япония, Кемерово, Азербайджан, Саха сирэ, Таджикистан тустууктара ыллылар!

«Триумф» успуорт уораҕайыгар Саха АССР, РСФСР, ССРС үтүөлээх тириэньэрэ Дмитрий Петрович Коркин кэриэһигэр XVI норуоттар икки ардыларынааҕы күрэхтэһии түмүктэннэ.

Быйыл өрөспүүбүлүкэ киинигэр 11 дойдуттан уонна Арассыыйа 11 эрэгийиэниттэн 215 тустуук кэлэн күөн көрүстэ. Сорох ыйааһыннарга дьиҥнээх тыҥааһыннаах киирсиилэр буоллулар. Күрэхтэһии ытыктабыллаах ыалдьыттарынан Москва уонна Сеул Олимпиадаларын икки төгүллээх чөмпүйүөнэ Сергей Белоглазов, Париж Олимпиадатын кыайыылааҕа Магомед Рамазанов уонна Арассыыйа национальнай хамаандатын сүрүн тириэньэрэ, Лондоннааҕы Оонньуулар призера Денис Царгуш буоллулар.

СӨ Ил Дархана Айсен Николаев эмиэ күрэхтэһиини кэлэн көрдө. Коркин турнира тэриллиэҕиттэн 16 сыл иһигэр аан бастакытын Саха сирин тустуу оскуолатын тоҕус бэрэстэбиитэлэ турнир финалыгар тиийдэ. Бу – улахан ситиһии.

«Триумф» уораҕайыгар Азия чөмпүйүөнэ, Японияттын Такара Суда (61 кг ыйааһыҥҥа) дьиҥнээх фурору көрдөрдө. Кини үс утарсааччытын болдьоҕун иннинэ хотто, онтон полуфиналга Коркин-2023 турнирын чөмпүйүөнэ Кежик Монгуһу (Иркутскай уобалас) 10:0 ахсаанынан тэхиниичэскэйдик ыраастык кыайда. Көмүс мэтээлгэ уонна 200 тыһыынча солкуобай харчы бириискэ тигистэ. Кини аан дойдутааҕы «Хадарцевтар кубоктара» турнир призера Бато Сультимовы (Бүрээтийэ) 1:1 ахсаанынан хоппута. Япония хамаандатыгар иккис көмүс мэтээли Рэйдзи Учида (65 кг) аҕалла, кини Саха сирин күрэсчитэ Владислав Кривошапкины 5:0 ахсаанынан хотто.

Кемеровоттан кэлбит эдэрдэргэ Европа чөмпүйүөнэ Дмитрий Кудрин турнир сеткатын барытын үчүгэйдик ааһан, финалга 23 саастаахтарга аан дойду чөмпүйэнээтин призера кубинец Дженнис Гарзон Тамайоны (10:4) 79 кг ыйааһыҥҥа кыайда.

23 саастаахтарга Европа уонна аан дойду чөмпүйэнээттэрин призера Али Цокаев (Азербайджан) 86 кг ыйааһыҥҥа бастаата, кини бүтэһик киирсиигэ Бүрээтийэттэн Буянто Шадаповы (10:0) болдьоҕун иннинэ хотто.

Мииринэйтэн төрүттээх Евгений Аронов (97 кг) Арассыыйа чөмпүйэнээтин призера Константин Пшеничниковы (0:10) кытта утарыласта. Финал 70 кг ыйааһыҥҥа буолла. Саха Өрөспүүбүлүкэтин сүүмэрдэммит хамаандатын хапытаана, Ярыгин Куубагын уонна Арассыыйа чөмпүйэнээтин финалиһа Константин Капрынов, 2023 с. Париж Олимпиадатын кыттааччы Виктор Рассадинныын (Таджикистан) көрсүстэ. Рассадин официальнайдык Таджикистан  бэрэстэбиитэлэ да буоллар,  Саха сирин тустуу оскуолатын иитиллээччитэ. Бастакы киирсии Рассадиҥҥа 3:0 ахсаанынан түмүктэннэ. Иккис үс мүнүүтэлээх киирсиигэ Капрынов икки баалы төннөрдө, ол эрээри Виктор ону тута хос ылла, онтон өссө түөрт очукуону ылан, бүтэһик ахсааны 9:2 оҥордо. Виктор Рассадин – Дмитрий Петрович Коркин аатынан турнир аҕыс төгүллээх чөмпүйүөнүнэн буолла.

Уһук Илиҥҥи федеральнай уокурук биэс төгүллээх чөмпүйүөнэ, Мииринэй оройуонун тустууга Ньургун Сергин Д.П. Коркин аатынан норуоттар икки ардыларынааҕы күрэхтэһиини кыайда. Бу иннинэ үстэ иккис уонна үһүс миэстэлэргэ тиксэ сылдьыбыта. Чөмпүйүөн аатын иһин саха тустууга 92 киилэҕэ диэри ыйааһыҥҥа эдэрдэргэ Европа уонна аан дойду бастыҥнарын призера, Молдова элбэх төгүллээх чөмпүйүөнэ Шамхан Жабраиловы 3:0 ахсаанынан кыайда.

Саха сирин сүүмэрдэммит хамаандатыгар иккис көмүс мэтээли өрөспүүбүлүкэ чөмпүйүөнэ, Чурапчыттан Олег Фомин (74 кг) ылла. Кини финалга тахсарыгар түөрт утарсааччытын кыайбыта, онтон финалга монгол Тугцжаргал Эдэнэбаты 4:0 ахсаанынан кыайбыта.

57 киилэҕэ диэри ыйааһыҥҥа финалга Япония устудьуоннарын чөмпүйүөнэ, Император Куубагын призера Даита Кацуми уонна 23 саастаахтарга Европа чөмпүйүөнэ, Сунтаартан Лев Павлов таҕыстылар. Уустук киирсиигэ Павлов Япония күрэсчититтэн кыайыыны былдьаан, 3:1 ахсаанынан Коркин турнирын икки төгүллээх чөмпүйүөнүнэн буолла. Саха сиригэр төрдүс көмүс мэтээли Чурапчы улууһун ыарахан ыйааһыннаахтарга тустууга Никита Софронов аҕалла, кини финалга Никита Хабаровы 4:1 ахсаанынан кыайда.

Турнир түмүгэ:

57 кг

1. Лев Павлов (Саха сирэ);

2. Даита Кацуми (Япония);

3. Егор Явловский (Саха сирэ);

4. Артур Чебодаев (Красноярск).

61 кг

1. Такара Суда (Япония);

2. Бато Сультимов (Бүрээтийэ);

3. Кежик Монгуш (Иркутскай уобалас);

4. Александр Авелов (Саха сирэ).

65 кг

1. Рэйдзи Учида (Япония);

2. Вячеслав Кривошапкин (Саха сирэ);

3. Чаяан Монгуш (Тыва);

4. Турбаяр Давааням (Монголия).

70 кг

1. Виктор Рассадин (Таджикистан);

2. Константин Капрынов (Саха сирэ);

3. Цырен Дугаржапов (Бүрээтийэ);

4. Тайга Огино (Япония).

74 кг

1. Олег Фомин (Саха сирэ);

2. Тугцжаргал Эдэнэбат (Монголия);

3. Тамир Ешинимаев (Бүрээтийэ);

4. Сергей Якимов (Иркутскай уобалас).

79 кг

1. Дмитрий Куприн (Кемерово);

2. Дженнис Гарзон Тамайо (Куба);

3. Джабраил Гаджиев (Азербайджан);

4. Никита Сучков (Красноярск).

86 кг

1. Али Цокаев (Азербайджан);

2. Буянто Шадапов (Бүрээтийэ);

3. Азрет Улимбашев (Красноярск);

4. Бямбадорж Бат-Эрдэнэ (Монголия).

92 кг

1. Ньургун Сергин (Саха сирэ);

2. Шамхан Жабараилов (Молдова);

3. Дмитрий Зайнидинов (Красноярск);

4. Аркадий Погосян (Беларусь).

97 кг

1. Константин Пшеничников (Кемерово);

2. Евгений Аронов (Саха сирэ);

3. Юрий Иванов (Бүрээтийэ);

4. Чингиз Бальжинимаев (Бүрээтийэ);

125 кг

1. Никита Софронов (Саха сирэ);

2. Никита Хабаров (Саха сирэ);

3. Александр Гришин (Воронеж);

4. Остап Пасенок (Кемерово).