Коррекционнай оскуола устуоруйатыгар аан бастакы кыһыл көмүс мэтээл

Мөлтөхтүк көрөр уонна мөлтөхтүк истэр оҕолор өрөспүүбүлүкэтээҕи интэринээт-оскуолаларын үөрэнээччитэ Лия Заболоцкая эксээмэн түмүгүнэн, нуучча тылыгар биир кэлим эксээмэни 91 баалга, математиканы (судургутутуллубут) туйгун сыанаҕа туттаран, “Үөрэххэ ураты ситиһиитин иһин” кыһыл көмүс мэтээли ыларын бигэргэттэ.

Кини интэринээт-оскуола устуоруйатыгар орто оскуоланы кыһыл аттестатынан уонна кыһыл көмүс мэтээлинэн түмүктээбит бастакы үөрэнээччи буолар.

Кыһыл көмүс мэтээллээх оҕо үрдүк үөрэххэ киирэригэр эбии баалы ылар. Лия Москватааҕы театральнай институт режиссерскай бакылтыатыгар үөрэххэ киирэр баҕалаах. Бу туһунан Үөрэх уонна билим министиэристибэтин саайтыгар суруйаллар.
Лия оскуолаҕа үөрэнэр сылларыгар куруук ырыа, үҥкүү куруһуогар дьарыктаммыта, хорга ырыанан умсугуйара, маҥнайгы кылаастан туйгуннук үөрэммитэ.