Корвалолу иһэн баран уруулга олорбот ордук

Арассыыйаҕа бобуулаах эттиктэрдээх күүстээх дьайыылаах эмптэри иһэн баран, тимир көлөнү ыытыы 45 тыһыынча солкуобай ыстараапка уонна икки сылга диэри быраап быһыытыгар тиэрдиэн сөп. Маннык эмптэр ахсааннарыгар, холобур, корвалол киирсэр. Бу туһунан суруналыыстарга юрист Дмитрий Славнов кэпсээтэ.

«Бу РФ Административнай кодексатын 12.8 ыстатыйата – итирик туруктаах тырааныспары ыытыы. Өскөтүн маннык быһыы чуолкайа билиннэҕинэ, биир сыл аҥаарыттан икки сылга диэри быраап быһыыта уонна 45 тыһыынча солкуобай кээмэйдээх ыстараап ананыаҕа», — диэн Дмитрий Славнов бэлиэтээтэ.

Юрист этэринэн, массыынаны ыытарга  бобуу РФ наркотиктаах уонна психотропнай эттиктэрдээх испииһэгэр киирэр састааптаах эмтэргэ сыһыаннаах. Кинилэр ахсааннарыгар киэҥник тарҕаммыт сүрэх эмэ корвалол састаабыгар киирэр фенобарбитал баар. Эспиэр  бэлиэтээбитинэн, уопсайынан эмп иһин эппиэтинэс көрүллүбүтүн сүрүн төрүөтэ, маннык эттиктэртэн киһи организма ханнык баҕарар кэмҥэ өйүн сүтэрэн кэбиһэр кыахтааҕар сытар.

Доруобуйа харыстабылын министиэристибэтин испииһэгэр уоскутар дьайыылаах уонна этиловай испиирдээх 200-тэн тахса ааттаах эмп ыйыллыбыт. Славнов чопчулаабытынан, эппиэтинэскэ тардыыга суоппар организмыгар бобуулаах компоненнар көстүбүт чахчылара быһаарар.