Краснодар кыраай Ейскэй куоратыгар ыксаллаах быһыы-майгы биллэрилиннэ

Бэҕэһээ киэһэ Краснодар кыраайыгар Ейскэй куоракка Арассыыйа “СУ-34” бомбардировщик сөмөлүөтэ олорор дьиэҕэ сууллан, куоракка ыксаллаах быһыы-майгы биллэрилиннэ.

Оборуона министиэристибэтэ иһитиннэрбитинэн, алтынньы 17 күнүгэр соҕуруу байыаннай уокурук аэродромуттан “СУ-34” сөмөлүөт дьарыктанар көтүүтүгэр тахсан иһэн кыайан үрдүгү ылбакка, Ейскэй куоракка түспүт. Летчиктар түһүү кэмигэр катапульталанан быыһаммыттар. Сөмөлүөт тоҕус этээстээх олорор дьиэ үрдүгэр сууллан, бу дьиэҕэ тута баһаар барбыт. Баһаар туһунан иһитиннэрии киэһэ олохтоох бириэмэнэн 18:20 киирбит. Барыта 17 кыбартыыра уокка былдьаммыт. Быһа холуйан, баһаар кэмигэр сүүрбэччэ киһи эчэйбитэ, ол иһигэр үс киһи өлбүтэ биллэр. Баһаар бүтүннүү умуруорулунна.

Ыксаллаах быһыы-майгы министиэристибэтэ эмсэҕэлээбит дьоҥҥо туох баар көмөнү оҥорор. Сөмөлүөт сууллубут дьиэтиттэн дьону гостиницаларга, пансионаттарга көһөрдүлэр.

Куоракка ыксаллаах быһыы-майгы биллэрилиннэ. РФ бэрэсидьиэнэ Владимир Путин Краснодар кыраайын губернаторын Вениамин Кондратьев, ЫБММ салайааччытын Александр Куренков уонна РФ доруобуйатын харыстабылын миниистирин Михаил Мурашко дакылааттарын истэн баран, кинилэргэ Ейскэйгэ тиийэн тута көмөнү оҥороллоругар сорудахтаата.

Ыспыраапка: Ейскэй куорат Азовскай муора соҕуруу биэрэгэр турар, Краснодар кыраай саамай хотугу куората буолар. Краснодартан 247, кыраныыссалаһа турар эрэгийиэнин кииниттэн Ростов-на-Дону куораттан 172 км ыраах сытар. Нэһилиэнньэтин ахсаанынан кыраайга бэһис миэстэҕэ иһэр. Куорат муора пордунан биллэр.