Креативнай индустрия кэллиэһин устудьуоннара бэтэрээннэри кытары көрүстүлэр

Бүгүн Креативнай индустрия кэллиэһигэр Аҕа дойду тас өттүгэр ытык иэстэрин толорбут интернационалист буойуттар күннэригэр уонна кэлэн иһэр Аҕа дойдуну көмүскээччи күнүгэр аналлаах «Эр санааланыы уруога» буолан ааста.

Тэрээһиҥҥэ Афганистан сэриитин кыттыылааҕа, байыаннай сулууспа бэтэрээнэ, бөртөлүөтүнэн көппүт эписсиэр-лүөччүк Николай Михайлович Самсонов,  байыаннай дьайыы бэтэрээнэ, Донбасс доброволецтарын сойууһун эрэгийиэннээҕи салаатын салайааччыта Аркадий Аркадьевич Пудов,  байыаннай дьайыы бэтэрээнэ, кикбоксиҥҥа ХНТ үтүөлээх тириэньэрэ, «Саха Боотур» байыаннай-успуорт уонна патриотическай иитии киинин салайааччыта Андрей Юльевич Артамонов уонна «Нам улууһун культуратын”, “Түбэ нэһилиэгин сайдыытын иһин” бэлиэ, “Туллук хаара” ырыа айааччыларын түмсүүлэрин чилиэнэ, Саха Өрөспүүбүлүкэтин үтүөлээх оһуохай этээччитэ Аскалон Лукич Егоров кытыннылар.

Кэпсэтии сүрүннээн норуот сүрүн сыаннастарыгар олоҕурда: дьоһуннаах олох, дойдуга бэриниилээх буолуу, устуоруйа өйдөбүлэ уонна көлүөнэлэр ситимэ.

Николай Самсонов сахаҕа сэдэх идэтин, сулууспатын, Афганистан сэриитигэр кыттыытын туһунан кэпсээтэ.

“Мин Афганистаҥҥа Кабулскай полкаҕа транспортнай эскадрильяҕа сулууспалаабытым. Дьиҥнээх сэриигэ, биллэн турар, уйулҕа өттүнэн олус ыарахан, ол эрээри киһи туохха барытыгар үөрэнэр. Сэрии диэн туох даҕаны үчүгэйэ суох, ол эрээри аан дойдуга буолар балаһыанньаҕа бэлэм буолуохха, дойдуну көмүскүөххэ наада. Кэлин 1982-1986 сс. Московскай байыаннай уокурукка вертолетнай үөрэтэр кииҥҥэ үлэлээбитим. Манна бөртөлүөттэр бары бастакы бойобуой бэрэбиэркэни ааһаллар. 1986-1999 сс. көрдүүр-быыһыыр эскадрилья диэн баара, онно кэлэн үлэлээбитим. Билигин биэнсийэҕэ даҕаны таҕыстарбын, харабылынан үлэлиибин. Онон ыччат үлэттэн куттаммакка, эйэлээх олоххо дьоһуннаахтык олоруохтааххыт, дойдугутун көмүскээччи буолуохтааххыт”, — диэн ыччакка эттэ.

Аркадий Пудов байыаннай дьайыыга кыттыытын туһунан аҕынна, учуутал киһи быһыытынан ыччаттар үөрэҕи өрө туталларыгар, ийэ дойдуларыгар бэриниилээх буолалларыгар баҕа санаатын эттэ.

“Мин идэбинэн оскуолаҕа үлэлиибин. Сүрүн эбээһинэскит бастатан туран, үөрэххит уонна Ийэ дойдугутун көмүскээһин буолар. Билэргит курдук дойдуга  байыаннай дьайыы бара турар. Мин манна бэйэм уопуппунан этиэм этэ, билигин дроннарынан киирсии барар. Элбэх киһи онно араас эчэйиини ылан, бэйэлэригэр мэдиссиинэ көмөтүн кыайан оҥостубакка өлөр түгэннэрэ үгүс. Онон эйэлээх даҕаны олоххо, хайаан даҕаны тактическай мэдиссиинэ көмөтүн оҥорорго үөрэниэххитин наада. Дьоруойдуу быһыыны сэриигэ эрэ сылдьан оҥоһуллубат. Биһиги ортобутугар, аттыбытыгар эмиэ дьоруойдар элбэхтэр. Ыксаллаах быһыыга-майгыга күүстээх быһаарыныыны ылынаннар, дьону быыһыыллар”, — диэн Аркадий Пудов кэпсээтэ.

Андрей Артамонов бу үһүс көрсүһүүлэрэ буоларын бэлиэтээн туран, кэлэр көлүөнэни патриотическай иитиигэ өссө даҕаны бииргэ үлэлэһиэхтэрин эттэ.

«Саха Боотур» диэн уопсастыбаннай тэрилтэ аатыттан кыттабын. Биһиги номнуо төрдүс сылбытын ыччаты патриотическай тыыҥҥа иитиигэ үлэлэһэбит. Эһиги кэллиэскитигэр бу үһүс тэрээһиммит. Биһиги эмиэ эһиги курдук убайдарбыт, биир дойдулаахтарбыт, ааспыт көлүөнэ холобуругар иитиллибиппит. Афганистан сэриитигэр сылдьыбыт аҕа табаарыстарбытын көрөн, кинилэр курдук Ийэ дойдубутун көмүскүүр санааны ылыммыппыт. 2022 с.  байыаннай дьайыыга барбытым. Угледар аннынан, Волновахоҕа бойобуой сорудаҕы толорбуппут. 2-с разведка бөлөҕөр сылдьыбытым. 32 сыл тириэньэринэн үлэлээн кэллим. Мин билигин төрүт үгэстэрбитигэр олоҕуран улаатан эрэр оҕолору иитэбит. Сайын аайы Боотур уһуйаанын тэрийэн араас улуустартан оҕолору түмэн үөрэтэбит, дойдутугар бэриниилээх оҕону уһуйан таһаарабыт. Биһиги оһуохайы өрө тутабыт, тоҕо диэтэххэ, оһуохай түмэр күүстээх”, — диэн Андрей Артамонов кэпсээтэ.

Кэллиэс устудьуоннара олус сэргээн иһиттилэр, бэйэлэрин ырыаларынан, презентацияларынан, хомуска оонньоон тэрээһини киэргэттилэр. «Эр санааланыы уруога» оҕолорго дойдуларын устуоруйатыгар ытыктабылы, кини ситиһиилэринэн киэн туттууну уонна бэйэлэрин өрөспүүбүлүкэлэрин, дойдуларын дьоһуннаах дьоно буоларга дьулуһууну иитиигэ улаханнык көмөлөһөр.

Бэлиэ тэрээһин Дархан этээччи Аскалон Егоров оһуохай этиитинэн түмүктэннэ.