«Креативнай индустриялар лиидэрдэрин иитэн таһаарабыт”

СӨ Үүнэр көлүөнэ тус сыаллаах пуондата АЛРОСА хампаанньаны кытары оҕолору эбии үөрэтии чэрчитинэн креативнай индустриялар  эйгэлэригэр тэрээһиннэри уонна бырайыактары олоххо киллэрэллэр.

Кинилэр бииргэ үлэлээһиннэринэн, Саха сирин үөрэнээччилэрэ айар идэлэргэ босхо үөрэнэр кыахтаналлар. АЛРОСА үбүн суотугар тутуллар  Үүнэр көлүөнэ паарката оҕолор уонна улахан дьон урбааҥҥа уонна креативнай үөрүйэхтэри ылалларыгар хайысхаламмыт аныгы эйгэнэн буолуоҕа. Уопсастыбаннай пааркалаах уонна үөрэтэр кииннээх,  сылы быһа үлэлиир киэҥ эйгэҕэ баар буолуохтаах эбии үөрэхтээһин тэрилтэлэрин кластера хайыы үйэ билигин үлэлиир уонна учууталлартан, араас хайысха исписэлиистэриттэн хамаанданы, айар ыччаты  хомуйар. Сүүһүнэн үөрэнээччи Паарка тэрээһиннэригэр бастакы хардыыларын оҥорор. Кинилэр хас да сылынан ситиһиилээх исписэлиис буоланнар,  Саха сирин креативнай индустриятын сайыннарыахтарын сөп.   Паарка аныгы туһалаах үөрүйэхтэри, хаачыстыбалаах үөрэҕи тэҥинэн  биэрэр уонна идэҕэ хайысхалыыр  үлэни булла диэн эрэллээхтик этиэххэ сөп.

ххх

Үүнэр көлүөнэ паарката туох-ханнык тэрээһиннэри ыытарын, дойду экэниэмикэтигэр креативнай индустриялар төһө суолталаахтарын  уо.д.а. туһунан Үүнэр көлүөнэ пааркатын  дириэктэрэ Вадим Яковлев:

«Ыам ыйыгар биһиэхэ,   “Креасфера”  үөрэх киинигэр Дьокуускай куорат үөрэнээччилэригэр “Архитектура”, “Фильммейкинг” уонна  “2D-графика” хайысхаларынан маастар-кылаастар буолбуттара. Биһиги креативнай индустрия бары хайысхаларын туһунан өйдөбүлү биэрэргэ, санаалары түмэ үөрэнэллэригэр, айар бырайыактары толкуйдуулларыгар кыһаллыбыппыт. Маастар-кылаастарга 39 үөрэнээччи кыттыбыта.

Онтон ыам ыйын бүтүүтэ “СтикерПАРК” воркшоп ыыппыппыт. Стикердэр киһи тугу саныырын дьиҥ чахчы ойуулаан көрдөрөргө көмөлөһөллөр. Билиҥҥи оҕолор уонна ыччаттар ону бэйэ-бэйэлэрин кытары алтыһалларыгар көхтөөхтүк туһаналлар. Ону таһынан ити тус уонна дьыалабыай коммуникацияҕа туһалаах үнүстүрүмүөн”, — диэн кэпсээтэ.

От ыйын 10 күнүттэн атырдьах ыйын 15 күнүгэр диэри «Лето в Креасфере» оҕо үөрэнэр-сынньанар бырагырааматыгар үс симиэнэ үлэлээбитэ. Анимацияҕа, айар үлэҕэ уонна креативка аналлаах бырагыраамаҕа 57 оҕо кыттыбыта.  Паарка дириэктэрэ бэлиэтээн эппитинэн, өрөспүүбүлүкэҕэ креативнай индустриялар экосистемалара уонна стратегиялара хайыы үйэ оҥоһуллубуттара. Аныгыскы хардыы – каадырдары бэлэмнээһин.

“Креативнай салааларга үчүгэй түмүктэр биһиги өрөспүүбүлүкэбитигэр олорор  тус сыаллаах уонна креативнай дьон көмөтүнэн  ситиһиллэллэр. Биһиги талааннаах оҕолору буларга уонна кинилэри айар үлэлэринэн  интэриэһиргэтэргэ кыһаллабыт.  АЛРОСА   өйөбүлүнэн оҕолор уонна ыччаттар айар-тутар кыахтарын сайыннарарга бары күүһү ууруохпут”, — диэтэ Вадим Яковлев.

Баҕа санаа хамаандата

Оҕолору кытары үлэ Үүнэр көлүөнэ пааркатын соҕотох хайысхата буолбатах. Паарка хамаандата учууталлары кытары эмиэ көхтөөхтүк үлэлиир. Ол курдук, бэс ыйын саҥатыгар учууталларга, эбии үөрэхтээһин  педагогтарыгар, баһаатайдарга уонна кинилэр көмөлөһөөччүлэригэр “Анимация” бырагыраамаҕа идэни үрдэтэр куурустар ыытыллыбыттара.

Абаҕа сэлиэнньэтиттэн сылдьар Богдан Васильев оҕо эрдэҕиттэн айар үлэнэн дьарыктанар, тыйаатыр куруһуогар сылдьар, норуот үҥкүүтүнэн уонна кинематографиянан үлүһүйэр. Кини 2020 сыллаахха  оҕо киинэтин улуустааҕы куонкуруһугар Гран-прины ылбыта, 2021 сыллаахха “Ийээ, мин эйигин таптыыбын!” видеороликтар улуустааҕы куонкурустарыгар кыайбыта. Соторутааҕыта Богдан Үүнэр көлүөнэ паарката уонна СӨ наукаҕа дьоҕус академията ыытар  «КиноМАНиЯ» үөрэх симиэнэтин туһунан билбитэ уонна төрөппүттэрин кытары сүбэлэһэн баран, сайаапкатын ыытарга быһаарыммыта.

“… Мин бу симиэнэҕэ сылдьан баран салҕыы  Паарка тэрээһиннэригэр кыттыбытым. Доҕотторбун кытары Медиахакатоҥҥа кыттан,  бастакы миэстэни ылбыппыт, “Архетон” диэн архитектура куонкуруһугар кыттыбытым, онтон сайын «Skills Camp» лааҕырга  алын сүһүөх баһаатай  буолбутум. Ону таһынан Креасфераҕа волонтердуубун», — диэн Богдан Үүнэр көлүөнэ пааркатын тэрээһиннэригэр кыттыы бэйэтигэр эрэли үөскэппитин уонна АГИКИ-га режиссер идэтигэр киирэргэ быһаарыммытын туһунан кэпсээтэ.

Влада Иванова Дьокуускай куораттааҕы лиссиэй  6-с кылааһыгар үөрэнэр уонна «Лето в Креасфере» үөрэтэр-сынньатар лааҕыр бастакы сезонугар сылдьыбыта.

«Анимация маастар-кылаастарыгар биһиги көмпүүтэргэ уруһуйдаабыппыт уонна пластилинтан оҥоһуктары бэлэмнээбиппит. Манна ылбыт ити үөрүйэхтэрим  инникитин туһалыахтара дии саныыбын. Инникитин модельер буолуохпун эбэтэр  тугу эрэ толкуйдуур, уруһуйдуур айар үлэҕэ сыстыахпын баҕарабын”, — диэн  Влада кэпсээтэ.

Сотору кэминэн Пуонда бырайыага – Үүнэр көлүөнэ паарката  Дьокуускайга айар ыччаты тардар сиринэн буолуоҕа. Бу оҕолортон ким эмэ инникитин идэлээх архитектор, дизайнер эбэтэр режиссер буолуон сөп.