Крым Арассыыйаҕа холбоспут күнүнэн Ил Дархан эҕэрдэтэ

Ытыктабыллаах Саха сирин олохтоохторо! Күндү доҕоттор!

Бүгүн биһиги дойдубутугар бүтүннүүтүгэр ураты күн.
Саха Өрөспүүбүлүкэтин салалтатын уонна тус бэйэм ааппыттан эһигини Крым Арассыыйаны кытта холбоспут күнүнэн эҕэрдэлиибин!
Бу күн дойдубут историятыгар норуот дьулуһуутун, Аҕа дойдуга тапталын, судаарыстыбабыт саҥа историятыгар дойду бары муннуктарыгар патриотизм күүһүрүүтүн курдук киирдэ.
Крым олохтоохторо 2014 сыллаахха Арассыыйаны кытта холбоһор туһугар 97 % куоластарын биэрэн, референдумҥа бэриниилээх буолуу, патриотизм уонна гражданскай хорсун буолуу холобурун көрдөрбүттэрэ.
Крым Арассыыйа судаарыстыбатын иһигэр төннүүтэ, төрөөбүт сиригэр төннүүтэ Арассыыйа олохтоохторун өйүгэр-санаатыгар чаҕылхай түгэнинэн хаалан, биһигини ханнык баҕарар моһоллору уонна ыарахаттары туоруурга өрө күүрдэр, история кырдьыгын уонна Арассыыйа Федерациятын чэчирии сайдарын туһугар иннибит диэки саҥа кыайыыларга сирдиир.
Крым сааһа кэлэр көлүөнэлэргэ биһиги Аҕа дойдубут күүһэ — сомоҕолоһууга уонна түмсүүгэ, норуоттара эрэллээх уонна хорсун буолууларын санатыаҕа.

Крым өрөспүүбүлүкэтэ тэтимнээхтик сайдар уонна Арассыыйа Федерациятын эрэгийиэннэрин кытта таһаарыылаах бииргэ үлэлээһини олохтуур, ол иһигэр, Саха Өрөспүүбүлүкэтин кытта. Биһиги эрэгийиэннэрбит 2025 сылга диэри социальнай-экэнэмиичэскэй, научнай-тэхиньиичэскэй уонна социальнай-култуура өттүнэн Сөбүлэһиини ситиһиилээхтик олоххо киллэрэллэр. Биһиги бииргэ туризмы, эргиэни, тыа хаһаайыстыбатын сайыннарабыт. Уопсай күүһүнэн Крым здравницаларын чөлүгэр түһэрдибит, уруккуттан култуураҕа уонна наукаҕа сибээспитин бөҕөргөттүбүт, оҕолорбутугар аатырбыт «Артек» лааҕыры төнүннэрдибит, Саха сирин олохтоохторугар Крым кэрэ дыбарыастарын уонна мусуойдарын хаттаан арыйдыбыт — биһиги барыбыт нэһилиэстибэтин.

Крым Өрөспүүбүлүкэтигэр кылгас болдьоххо экэниэмикэҕэ, култуураҕа уонна социальнай эйгэлэргэ улахан уларыйыылар таҕыстылар. Уһуйааннары уонна оскуолалары тутуу уонна өрөмүөннээһин ыытыллар, мэдиссиинэ сайдар. Крым муостата дойдубут киэн туттуутунан буолар.
Күндү доҕоттор! Бука барыгытыгар эйэни, сарсыҥҥы күҥҥэ эрэли, саҥа ситиһиилэри уонна сайдыыны баҕарабын!

Саха Өрөспүүбүлүкэтин баһылыга Айсен Николаев