«КСБ: Как стать боссом» киинэ дойду араас куораттарыгар көстүөҕэ

Бэҕэһээ, сэтинньи 25 күнүгэр, «Лена» киинэ тыйаатырыгар «КСБ: Как стать боссом» диэн Айаал Струкин режиссердаах, Степан Порядин продюсердаабыт кэмиэдьийэ аҥаардаах сахалыы киинэ сабыылаах көрүүтэ буолла.  Киинэ сүрэхтэниитэ бу чэппиэргэ, сэтинньи 27 күнүгэр, буолуоҕа.

Киинэҕэ сылдьан баран тус санаабын үллэстиэх санаам кэллэ. Ол курдук судургу соҕус сюжеттаах киинэни талааннаах артыыстар оонньоон тупсарбыттарын бэлиэтии көрдүм. Криминальнай драма көстөр эрээри, күлүүлээх өрүттэрдээх буолан киинэни киһи ыараханнык ылыммат. Киинэ түмүгэ криминалы үтүө санаа, дьолго туруулаһыы кыайара олус бэрт.

Киинэҕэ  босс оруолун оонньуур талааннаах артыыс Виталий Щукин санаатын үллэһиннэ:

-Киинэҕэ продюсер, артыыс быһыытынан кытынным. Дьээдьэ Леня оруолун толордум. HITS Production  10 сыллаах үбүлүөйүн көрсө уһуллубут. Олус долгуйдум. Киинэбит сэтинньи 29 күнүттэн дойду араас куораттарыгар тэҥҥэ көстүөҕэ. Ол курдук Москва, Санкт-Петербург, Сочи, Новосибирскай, Улан-Удэ, Калининград о.д.а. куораттарга көстүөҕэ.