«КСБ: Как стать боссом» киинэ каасса хомууругар саҥа рекорду олохтоото

«HITS Production» устубут  «КСБ: Как стать боссом» диэн сахалыы кэмиэдьийэтэ премьераттан бастакы өрөбүллэригэр 10 086 770 солкуобайы хомуйан, рекорду олохтоото. Бу туһунан Киинэлэри биир кэлим автоматизированнай иһитиннэрэр систиэмэ (ЕАИС) дааннайдара туоһулууллар.

Режиссер Айаал Струкин уонна сценарист Ксей Бакин быйылгы сылга иккис киинэлэрэ буолар. Сааһыары кинилэр «Мин уолум – айдол!» диэн киинэлэрэ тахсан, прокакка 13,5 мөлүйүөн солкуобайы хомуйбута. «Хайдах босс буолуохха» диэн  кэмиэдьийэ икки табыллыбат доҕордуулар тустарынан кэпсиир. Кинилэр соһуччу бандьыыттар баандаларын саҥа бостара буолан хаалаллар. Сүрүн оруоллары Владимир Тимофеев, Виталий Щукин уонна Иннокентий Хобуев толордулар.