Хаартыска: Саргылаана Афанасьева.
Бу күннэргэ Саха сирин киин куоратыгар Дьокуускайга аан бастаан художественнай гимнастикаҕа Уһук Илиҥҥи федеральнай уокурукка бастыыр иһин күрэхтэһиилэр буола тураллар.
Маастарга хандьыдаат, 1-кы разрядтаах гимнастар хамаанданан уонна биирдиилээн бөлөххө күрэстэһиилэрэ үгүс көрөөччү болҕомтотун тартылар. Күрэхтэһии иккис күнүгэр 13-14 саастаах (2011-2012 с.т.) успуорт маастарыгар хандьыдааттар күөн көрүстүлэр. Биирдиилээн бырагыраамаҕа 1-кы разрядтаах гимнасткалар (2013-2014 с.т.) икки көрүҥҥэ күрэхтэстилэр.
Гимнастар күрэхтэһиилэрин 35 суудьуйа дьүүллүүр. Кылаабынай суудьуйа – Улан-Удэттэн сылдьар Вероника Маркахшинова. Саха сириттэн судьуйа састаабыгар Татьяна Шишигина баар. Уопуттаах тириэньэр бу күрэхтэһии кылаабынай суудьуйатын солбуйааччытынан үлэлиир. Маны тэҥэ суудьуйалар ортолоругар Виолетта Иванова-Никифорова, Виктория Велькер, Светлана Павлова уонна Александра Бронских бааллар.
Үтүөлээх маастар, олимпиада чөмпүйүөнэ, СӨ гимнастарын хамаандатын кылаабынай тириэньиэрэ Ксения Дудкина Саха сирин иккис дойдутун курдук саныыр.
— 2015-2016 сылларга мин Дьокуускайга олоро сылдьыбытым. Үлэбинэн өрүү кэлэ-бара сылдьабын. Саха сирин хамаандата Москваҕа баазаланан анаан эрчиллэр буолан, бу суолталаах күрэхтэһиигэ биһиги толору бэлэмнээхпит. Өрөспүүбүлүкэ чиэһин 20 гимнастка: 10 успуорт маастарыгар хандьыдаат, 10 – 1-кы разрядтаах спортсмен уонна 4 бөлөҕүнэн кыттар хамаанда көмүскүөҕэ. Бу күрэхтэһиигэ Уһук Илин 9 эрэгийиэнин күүстээх сүүмэрдэммит хамаандалара кыттар буолан, олус үрдүк таһымнаах күрэхтэһии буола турар. Маны таһынан, Арассыыйа сүүмэрдэммит хамаандатын чилиэнэ Кира Яблочникова Сахалин уобалаһын аатыттан кыттар. Гимнастар үгүстэрэ Саха сиригэр аан бастаан кэллилэр, — диэн бэлиэтээтэ Ксения Дудкина.
Бастакы күн кэнниттэн Уһук Илин эрэгийиэнигэр бастыыр иһин урукку киирсиилэр кыайыылаахтара, Арассыыйа уонна норуоттар икки ардыларынааҕы турнирдар кыайыылаахтара, художественнай гимнастикаҕа дойду сүүмэрдэммит хамаандатын чилиэнэ Кира Яблочникова инники күөҥҥэ сылдьар. Кини 2024 сыллаахха Дьокуускайга “Азия оҕолоро” оонньууларга кыттан, боруонса мэтээли ылбыта.
266 спортсмен кыттар күрэхтэһиитэ сарсыарда эрдэттэн киэһэ хойукка диэри ыытылла турар. Түмүк боротокуол түүн оҥоһуллан бүтэр, онон кыттааччылар сарсыарданан эрэ ким инники күөҥҥэ тахсыбытын билэллэр. Саха сирин хамаандата 13 хамаандаттан бөлөҕүнэн кыттыыга кыайыылаах иһэр. Бу күрэхтэһии — бастыҥнары талыы сүрүн түһүмэҕэ. Саха сиригэр аан бастаан ыытыллыбыт күрэхтэһии түмүгүнэн Уһук Илиҥҥи федеральнай уокурук сүүмэрдэммит хамаандата тэриллиэҕэ. Муус устарга Санкт-Петербург куоракка уус-уран гимнастикаҕа ыытыллар Арассыыйа чөмпүйэнээтигэр саҥа тэриллибит хамаанда Уһук Илин уокуругун чиэһин көмүскүөҕэ.
Быйыл Өймөкөөн улууһун нэһилиэктэригэр хайа да сыллааҕар түмүктээх, сонун сүүрээннэри саҕар олохтоох былаас отчуота буолан…
Лена куорат биир тутаах тэрилтэтигэр буҕаалтырынан үлэлээбитэ отучча сыл буолан эрэр. Бүгүн киэһэ үлэтиттэн тахсар…
Бу туһалаах судургу сүбэлэр кимиэхэ баҕарар наада буолуохтара. Оҕо сарсыарда уһуктан биэрбэтэҕинэ, сөбүлүүр ойуулугун эбэтэр…
sakha-sire.ru саайт «Кэпсээннэ истиэҕиҥ» диэн бырайыагар «Саха сирэ» хаһыат суруналыыһа Ульяна Захарова «Кыыс кыһалҕата» кэпсээнин…
Таатта улууһун И.В. Николаев аатынан Харбалаахтааҕы норуот айымньытын дьиэтигэр Ийэ-тыл уонна сурук-бичик күнүнэн «Омук күүһэ…
Кэнники кэмҥэ дьон өбүгэлэрин, төрүттэрин үөрэтэ, билэ сатыыр буолла. Ол эрээри, үгүстэр туохтан саҕалыылларын, архыыпка…