Куйаар ситимигэр мааты-кууту суруйууну хааччахтыахтара

Куйаар ситимигэр маат-куут тыллаах контент тохтотуллуоҕа. Бу сокуон барылын Судаарыстыбаннай Дуума информационнай бэлиитикэҕэ кэмитиэтин бэрэссэдээтэлин бастакы солбуйааччыта Андрей Свинцов киллэрдэ. Бу туһунан «Парламентская газета» суруйар.

«Сокуон барыла ылыллыбытын кэннэ контент ааптардара сыыппара платформаларыгар уонна социальнай ситимнэргэ сонуннары таһаарыахтарын иннинэ, маат-куут тыллаах сонуннары суох оҥорорго эбэтэр кистииргэ дьаһаллары ыылынар буолуохтара», — диэн Судаарыстыбаннай Дуума электроннай баазатыгар баар докумуоҥҥа ыйыллар.

Бу иннинэ Судаарыстыбаннай Дуума информационнай бэлиитикэҕэ кэмитиэтэ интэриниэт-платформалары төрүт үгэс сыаннастары түһэрэр контеҥҥа киириини хааччахтыырга эбээһинэстиир, ону таһынан киинэлэргэ прокаттыыр дастабырыанньаны биэрэртэн аккаастыыр төрүөттэри кэҥэтэр көннөрүүлэри өйөөбүтэ. Бу миэрэлэр култуурунай эйгэни көмүскүүргэ туһуланаллар уонна интэриниэккэ буортулаах иһитиннэриини хааччахтыыр, ол иһигэр оҕолору көмүскүүр көҕүлээһиннэри толороллор.