Салгыы
Култуура диэйэтэллэрэ Чурапчыга түмсүөхтэрэ

Култуура диэйэтэллэрэ Чурапчыга түмсүөхтэрэ

Ааптар:
23.02.2023, 16:00
Бөлөххө киир:

Олунньу 21 күнүгэр Дьокуускайга, Былатыан Ойуунускай аатынан Саха академическай тыйаатырын Алампа саалатыгар Чурапчы улууһун Култуураҕа управлениетын 9 киһилээх дэлэгээссийэтэ Дьокуускайга олорор биир дойдулаахтарын – култуура, искусство, литература диэйэтэллэрин кытта көрүстэ.                                                 

Дэлэгээссийэ салайааччытынан Чурапчы улууһун Култуураҕа управлениетын саҥа начаалынньыга Петр Егорович Гуляев буолар.  Кини эстафетаны улуус култууратын үгүс сыл айымньылаахтык салайан кэлбит Дмитрий Поповтан туппута 3-с ыйыгар барда.  Дмитрий Дмитриевич билигин улуустааҕы Олоҥхо дьиэтин дириэктэринэн үлэлиир. Кини дэлэгээссийэ састаабыгар баар. Итиэннэ көрсүһүүгэ Култуура управлениетын начаалынньыгын солбуйааччы Айталина Смирникова,  улуустааҕы “Айылгы” Култуура уонна духуобунай сайдыы киинин дириэктэрэ Розалия Игнатьева, Чурапчы улууһунааҕы А.А. Саввин аатынан история уонна этнография  мусуойун дириэктэрэ Юрий Толстоухов, Улуус Мунньаҕын дьокутаата, Төлөй Култууратын киинин дириэктэрэ уонна тыа кулууптарын барыларын сүрүннээччи Максим Смирников, Чурапчы улууһун библиотекаларын ситимин дириэктэрэ Вера Аполлоновна Платонова, Чурапчытааҕы Оҕо музыкальнай оскуолатын дириэктэрэ Алла Сивцева уонна Чурапчы нэһилиэгин “Айыллаан” Култуура киинин дириэктэрэ Снежана Титова кытыннылар.  Улуус култууратын үлэһиттэрэ  Дьокуускайга олорор биир дойдулаахтарын — култуура исписэлиистэрин, салайааччылары, артыыстары суруйааччылары, худуоһунньуктары, суруналыыстары кытта көрсөн, ирэ-хоро сэһэргэстилэр. Кинилэр ортолоругар “Симэх” Саха өрөспүүбүлүкэтин норуотун маастардарын киинин дириэктэрэ Яна Игнатьева,  саха норуодунай суруйааччыта Семен Андреевич Попов-Тумат, биллиилээх худуоһунньуктар Александра Бочкарева-Иннокентьева-Сууралдьыма, Мария Гуляева-Туойа, биллиилээх артыыстар Геннадий Турантаев, Николай Протасов, Анна Флегонтова, Чурапчы күтүөтэ саха норуодунай артыыһа Алексей Павлов кэргэнинээн Мотрена Степановналыын, суруналыыстар Лена Керемясова, Иван Тарасов, Марфа Пермякова, уо.д.а. бааллар.

Саха норуодунай суруйааччыта Сэмэн Тумат санаатын үллэстэр

— Ытыктабыллаах Дмитрий Дмитриевичтэн  эстафетаны тутан, улуус култууратын салайбытым 3-с ыйыгар барда. Улууспут баһылыга Степан Анатольевич Саргыдаев биһиги иннибитигэр улахан соруктары туруорда. Чурапчы улууһуттан айар үлэ аартыгынан култуура, искусство киэҥ эйгэтигэр тахсыбыт дьоммут элбэх, онон, эһигинниин ирэ-хоро сүбэлэһээри кэлэн олоробут. Быйыл муус устар 3-5 күннэригэр биһиги улууспутугар Саха Өрөспүүбүлүкэтин Култууратын, литературатын, искусствотын Күннэрэ ыытыллаллар. Бу – улахан эппиэтинэс. Тэрээһиҥҥэ СӨ Бырабыыталыстыбатын Бэрэссэдээтэлэ Андрей Владимирович Тарасенко, СӨ Култуураҕа уонна духуобунай сайдыыга миниистирэ Юрий Степанович Куприянов кэлэн, кыттыыны ылыахтара. Итини сэргэ быйыл биһиэхэ үгүс үбүлүөйдээх даата баар, ол курдук, аатырбыт тириэньэрдэрбит Дмитрий Петрович Коркин төрөөбүтэ 95 сыла, Афанасий Кирикович Софронов төрөөбүтэ 95 сыла, норуодунай суруйааччыбыт Василий Семенович Яковлев-Далан 95 сыла, биллиилээх худуоһунньук Афанасий Петрович Собакин 95 сыла, суруйааччы Күн Дьирибинэ төрөөбүтэ 120 сыла, Чурапчы улууһунааҕы А.А. Саввин аатынан история уонна этнография  мусуойун 75 сыла, итиэннэ Тоҕус томтордоох Чурапчы сэлиэнньэтэ төрүттэммитэ 375 сыла. Онон, быйыл биһигини элбэх үлэ, саҥа, сонун бырайыактар күүтэллэр,  — диэтэ көрсүһүүнү саҕалыырыгар Петр Гуляев.

Салгыы кини Саха Өрөспүүбүлүкэтин Култууратын, литературатын, искусствотын Күннэрин бырагырааматынан улууска туох былааннанарын,  инники соруктары билиһиннэрдэ. Чахчыта да, бу Күннэргэ улууска култуура, искусство, литература улахан түһүлгэтэ тардыллара күүтүллэр. Саха сирин бастыҥ тыйаатырдара, мусуойдара, култуура үөрэҕин кыһалара, Саха сирин биллиилээх суруйааччылара, “Сахафильм” айар кэлэктиибэ, култуура, искусство диэйэтэллэрэ ыалдьыттыахтара – нэһилиэнньэни кытта көрсүһүүлэр, араас тиэмэлэргэ сэминээрдэр, маастар-кылаастар, “төгүрүк остуоллар” ыытыллыахтара, испэктээктэр, кэнсиэрдэр, киинэлэр көрдөрүллүөхтэрэ, быыстапкалар тэриллиэхтэрэ.

Быйыл саас кулун тутар 23-24 күннэригэр Дьокуускайга “Алаас ахтылҕана” биир дойдулаахтар көрсүһүүлэрэ буолуоҕа. Оттон аны сайын бэс ыйын 17-18 күннэригэр Маҕаайы алааһыгар үбүлүөйдээх ыһыах (режиссер И.И.Бушков) ыалдьыттарын көрсүөҕэ.

Улууска биир улахан суолталаах  тэрээһининэн быйыл манна “Музей воинской славы” аһыллыыта буолуоҕа. Итиэннэ дэлэгээссийэ салайааччыта, Афанасий Мунхалов аатынан Арт-галерея грант ылан, үлэ-хамнас өссө сэргэхсийэрин, улуус “Култуура мусуойа” бырайыакка үлэлэһэ сылдьарын, улуус нэһилиэктэригэр  Култуура дьиэлэрэ тутулла сылдьалларын, о.д.а. үтүө сонуннары иһитиннэрдэ,  инники былааннары — бырайыактары сиһилии билиһиннэрдэ.

Саха норуодунай суруйааччыта, биллиилээх публицист, суруналыыс Сэмэн Тумат уонна биллиилээх музыкант, суруналыыс, “Тэтим” араадьыйа эрэдээктэрэ, “Тыыннаах дорҕоон” ааптара уонна ыытааччыта Иван Тарасов тыл эттилэр.

Иван Тарасов.

Быйылгы үбүлүөйдээх, киэн туттар суруйааччыларбыт айар үлэлэрин дириҥник, киэҥник сырдатыыга улахан суолта бэриллэрэ олус наадалааҕын (холобур, эһиил Дьуон Дьаҥылы Пушкин “Евгений Онегинын” сахалыы саҥардыбыта 70 сылын туолар)  бэлиэтээтилэр. Итиэннэ Лена Керемясова, Александра Бочкарева-Сууралдьыма, Геннадий Турантаев, Матрена, Алексей Павловтар,  уо.д.а  санааларын үллэһиннилэр. Түмсүү кыттыылаахтара, төрөөбүт улуустарыгар көмөлөһөргө, сүбэ-ама буоларга бэлэмнэрин  биллэрдилэр.

Көрсүһүү кыттыылаахтара.

Түмүккэ, 9 секциялаах, 19 киһиттэн турар Координациялыыр сүбэ тэрилиннэ. Манна Сэмэн Тумат, Ольга Харайбатова, Александра Бочкарева-Сууралдьыма, Мария Гуляева-Туойа, Анна Флегонтова, Геннадий Турантаев,  Татьяна Гоголева, Оксана Жиркова, Егор Карпов, Евдокия Слепцова, Айталина Решетникова, Дария Дмитриева, Сахамин,  уо.д.а. култуура, искусство үлэһиттэрэ киирдилэр. Бэрэссэдээтэлинэн Яна Игнатьева, солбуйааччыларынан Лена Керемясова, Иван Тарасов талылыннылар.

— Үчүгэй көрсүһүү буолла. Саҥа тэриллибит Координациялыыр сүбэ  улууспутугар култуура, искусство, литература салгыы сайдыытыгар олук ууруо диэн эрэнэбит, — диэтэ кэпсэтиини түмүктүүрүгэр  дэлэгээссийэ салайааччыта  Петр Гуляев.

                                                                             Татьяна МАРКОВА.   

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
29 марта
  • -13°C
  • Ощущается: -20°Влажность: 40% Скорость ветра: 6 м/с

Сообщить об опечатке

Текст, который будет отправлен нашим редакторам: