Култуура эйгэтигэр — 50 сыл

Ньурба Дьиикимдэтиттэн төрүттээх Валентина Егоровна Сухаринова идэтинэн төрүт култуура учуутала. 25 сыл устата оскуолаҕа үлэлээбитэ, отуттан тахса сыл устата үҥкүү тылын утумнаахтык этэр.

2015 сыллаахха Тойуктаах Марыына аатынан кылаан этээччи аатын ылбыта. Валентина Егоровна Бүлүү бөлөх улуустарыгар биир бастыҥ этээччи быһыытынан тарбахха баттанар. Сергей Зверев аатынан республикатааҕы Тэлгэһэ оһуокайа күрэҕэр 2019 сыллаахха Ийэ кылыһах анал ааты ылбыта. Бэйэтэ этэрин таһынан, оһуокайга элбэх оҕону үөрэтэр. Дьокуускай куоракка көһөн кэлиэҕиттэн 14 нүөмэрдээх оскуолаҕа үөрэнэр сиэнин Айаал Лаптевы оһуокайга дьарыктыыр.

Ахсынньы 5 күнүгэр республикатааҕы Түмсүү сүбэтин уурааҕынан өр сыллаах үлэтин сыаналаан, саха сирин үтүөлээх аатын туттардыбыт. Валентина Егоровнаҕа ситиһиилэри баҕарабыт.

Марта Николаева