Култуура сыла: утум салҕанар

Арктикатааҕы Эпос уонна култуура киинин генеральнай дириэктэрэ Андрей Борисов кэлэр сыл Култуура сылынан биллэриллибититтэн үөрүүтүн кистээбэт:

-Ил Дархан маннык быһаарыныыны ылыахтааҕын ылла дии саныыбын, тоҕо диэтэххэ Туһаайыы этиитигэр биһиэхэ олус элбэх култуурунай кыах мунньулунна диэбитэ. Билигин биһиги саамай сүрүнү чуолкайдыыр кэммит үүнэн турар. Ол саамай сүрүнүнэн биһиги духуобунай сыаннаспыт буолар.

Айсен Николаев 2026 сылы Култуура сылынан биллэрэн,  култуура үлэһиттэригэр, диэйэтэллэригэр улахан соругу сүктэрдэ. Култуура диэн бырааһынньык эрэ буолбатах, бу духуобунай сайдыы төрдө. “Сила духа должна быть извечна” диэн этии баар, бу күүс киһини чэгиэн өйдөөх-санаалаах, үлэһит оҥорор, иннин диэки илдьэн иһэр. Онон Култуура сыла бу хайысханы тутуһан үлэлиэҕэ.

25 сыл анараа өттүгэр Олоҥхо киһи аймах нэһилиэстибэтин материальнайа суох шедевринэн биллэриллибитэ. Вячеслав Штыров бэрэсидьиэннии олорон, Олоҥхо ыһыаҕын, Олоҥхо тыйаатырын, Олоҥхо уон сылын тэрийэр хас да ыйааҕы таһаарбыта. Быйылгы Туһаайыы этиитигэр Ил Дархан Олоҥхо тыйаатырын Саха сирин норуоттарын култуурунай баайын-дуолун эбийиэгинэн билинэр, Олоҥхо үһүс уон сылын саҕалыыр ыйаахтары таһааран,  ити утум салгыы салҕанан иһэрин көрдөрдө. Ол курдук норуоттар икки ардыларынааҕы таһымнаах Арктикатааҕы Эпос уонна култуура киинэ тутулла турар. Эпос норуоттары түмэр, онон аан дойду норуоттарын түмсэр кииннэринэн буолуоҕа. Кэлэр сыл бүтүүтэ үлэҕэ киириэҕэ.