Култуура сылын ыаллыы сытар нэһилиэктэр бары бииргэ арыйдыбыт

Мукучу нэһилиэгэр олунньу 14 күнүгэр Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура, Кэбээйи улууһугар Олоҥхо сылларыгар анаммыт Култуура сылын үөрүүлээхтик арыйыы чугас эргин нэһилиэктэри кытта бииргэ ыытыллан бэрт сэргэхтик буолла.

Дьоро тэрээһиҥҥэ I-кы Лүүчүн, II-с Лүүчүн, Лүксүгүн, Арыттаах, Мукучу нэһилиэктэрин уус-уран самодеятельноһын дьоно-сэргэтэ кыттыыны ыллылар. Саала иһэ толору мустубут көрөөччү ытыһын тыаһа кыттааччылары үрдүккэ кынаттаата, долгутта.

Бу күн араас көлүөнэ дьон кэрэни кэрэхсиир, үтүөнү үксэтэр, биир сомоҕо тыыны уһугуннаран, Кэбээйибит мэҥэ хамсаныыларын кэлбит дьон бука бары сүһүөхтэригэр туран күргүөмүнэн үҥкүүлээтилэр. Маны тэҥэ култуура үлэһиттэрэ араас омук таҥаһын таҥнан, норуоттар сомоҕолоһууларын үҥкүүтүн өрө көтөҕүллэн туран толордулар.

Бэлиэ тэрээһиҥҥэ нэһилиэкпит, улууспут, өрөспүүбүлүкэбит култууратын сайдыытыгар сүҥкэн кылааттарын киллэрсибит дьоммутун эҕэрдэлээн грамоталарынан бэлиэтээтибит, хас биирдии кэлбит култуура дьиэлэригэр махтал суруктар, өйдөбүнньүк бэлэхтэр туттарылыннылар. Бу үтүө бачыымы көтөхпүт Анатолий Николаев аатынан «Дайан» норуот айымньытын дьиэтин үлэһиттэрин үтүө холобура салҕанан истин диэн нэһилиэк баһылыктара хардарыта сыһыаны бары эйгэҕэ өрө тутар дуогабарга илии баттастылар. Биир санаанан салайтаран, сырдык санаа көтөллөөх салгыы тигинэччи үлэлииргэ күүс-уох ылан тарҕастылар.

Бар дьоммутун бу үтүө киэһэҕэ доҕуһуоллаабыт истиҥ ытыс тыаһа арыаллаатын, күн күүһэ көмүскээтин, Айыы сарыала алҕаатын!

 

Вера Прокопьева, Мукучу.