Култуура уонна сынньалаҥ пааркатыгар уларыйыылар

Бу сайын Дьокуускай куорат култуура уонна сынньалаҥ паарката элбэх уларыйыылардаах үлэлиир. Куйаастан сылтаан аҕыйах киһи кэлэр буолан, сорох аттракционнар үлэлэрэ киэһээҥи кэмҥэ көһөрүллүбүттэр — 17-тэн 23 чааска диэри.

Эдэр ыччакка уонна улахан дьоҥҥо 200 солк. сыаналаах араас аттракционнар үлэлииллэр: «Замок дракона», «Фараон», «Пиратский корабль». Оттон кыра оҕолорго «Лошадки» карусель, «Ветерок» автопуойас, «Спортивный» батут, «Маугли» быа паарката, «Зорб», «Дик». «Солнышко», «Цепочная карусель» диэн ааттаах аттракционнар бааллар. Билиэт сыаната ортотунан 100–200 солкуобай. Маны таһынан, оҕолор оонньуур былаһааккалара баар, киириитэ босхо.

Билигин техническэй биричиинэнэн «Калипсо», «Форсаж», «Торопыжка» курдук аттракционнар быстах кэмҥэ сабыллан тураллар.

Аттракционнарга сылдьарга уопсай хаарта атыылаһыахха сөп.  Ол гынан баран, чааһынай аттракционнарга паарка хаартата үлэлээбэт, билиэттэри туспа каассаларга ылаҕын: «Автодром» сыаната 300 солк., «Веселые горки» — 200 солк., «Вальс» — 200 солк., «Летающая тарелка» — 200 солк., «Колесо обозрения» — 200 солк. (VIP кабинката – 250 солк).

Паарка иһигэр мини-зоопарк баар. Манна Ара попугай, кенгуру, страус, эбисийээнэлэр, пони, енот, дикобраз, рептилиялар, лемур, таба уонна атын кыыллары көрүөххэ сөп. Улахан киһи билиэтэ 300 солкуобай, оҕо киэнэ – 250. Элбэх оҕолоох дьиэ кэргэннэргэ билиэт 20% чэпчэтиилээх атыыланар, инбэлиит дьоҥҥо – босхо.

Дьон аһыырыгар, сынньанарыгар паарка киинигэр улахан фуд-корт үлэлиир. Итиэннэ араас тиирдэр, кыра оонньуур автоматтар, массыыналар уонна күүлэйдиир ыллыктар бааллар. Дьон «Оһуокай аллеятынан» күүлэйдиэн сөп. Манна элбэх тэрээһиннэр, акциялар буолаллар.

Паарка киириитигэр хаартаҕа ханна, ханнык аттракцион баарын көрүөххэ сөп.

Диана Антонова