Култуура уонна сынньалаҥ паарката ыам ыйын 30 күнүттэн үлэлиэҕэ

Бу күннэргэ киин куоракка “Азия оҕолоро” норуоттар икки ардыларынааҕы спортивнай оонньуулары көрсө тутаах тэрилтэлэргэ өрөмүөн үлэтэ ыытыллар.

Култуура уонна сынньалаҥ пааркатыгар өрөмүөн үлэтэ эмиэ буола турар. Куорат мээрэ Евгений Григорьев иһитиннэрбитинэн, өрөмүөн кэмигэр киин аллеяҕа 13 тыһыынча квадратнай метр аспаал оҥоһуллуоҕа. Маны таһынан, сынньанар сирдэр, ыскамыайкалар, сырдатар тирэхтэр өрөмүөннэнэллэр, саҥа күүлэйдиир сир тупсарыллар.

Паарканы кытта силбэһэ турар Комсомольскай болуоссакка өрөмүөн эмиэ ыытыллар. Былырыын, балаҕан ыйын 5 күнүгэр, Айсен Николаев РФ Бэрэсидьиэнигэр Дьокуускай маастар-былаанын билиһиннэрбитэ. Мунньах түмүгүнэн РФ бырабыыталыстыбатыгар үбүлээһин боппуруостарын хайысхаларынан быһаарарга сорудахтаммыта.  Маастар-былаан чэрчитинэн 90 эбийиэк тутуллуохтаах: Өлүөнэ муостатын тутуутуттан Ленин болуоссатын саҥардыыга тиийэ. Үрдүк үөрэх кампуһа, киинэ павильона, гостиницалар, норуоттар икки ардыларынааҕы аэропорт терминала, куорат хаһаайыстыбатын эбийиэктэрэ тутуллуохтара. 12 оскуола, 10 доруобуйа харыстабылын эбийиэгэ, 18 уһуйаан, 7 успуорт эбийиэгэ, суол тутуута, уулуссаны сырдатыы уо.д.а.  үлэ – бу барыта олоххо киирэн, киин куораты тупсарыыга туһуланыахтаах.