Култуура волонтердара байыаннай дьайыыга көмө туһунан билистилэр

Алтынньы 16-17 күннэригэр Дьокуускайга култуура волонтердарын өрөспүүбүлүкэтээҕи пуорума ыытыллар. Пуорумҥа уопуттаах волонтердар уонна хамсааһыҥҥа саҥа кыттыһыан баҕалаахтар, барыта 500-тэн тахса киһи муһунна.

Саха сиригэр волонтердар хамсааһыннара 2019 сыллаахха тэриллибитэ, быйыл иккис пуорум ыытылынна. Пуорумҥа култуура эйгэтигэр бэйэлэрин баҕаларынан үлэлиир волонтердар федеральнай эспиэрдэри кытары баар балаһыанньаны дьүүллэһэллэр, инники былааннары торумнууллар, уопуттарын атастаһаллар.
Кырдьыга да, үтүө дьыала туһугар көмөлөһөр баҕалаах волонтердар бааллара олус туһалаах. Куораттарга, улуустарга, бүтүн өрөспүүбүлүкэҕэ ыытыллар улахан тэрээһиннэргэ кинилэр көмөлөрө суох сатаммаккын. Үксүгэр биир таҥастаах-саптаах, үөрбүт-көппүт сирэйдээх-харахтаах эдэр ыччаттар-волонтердар сүүрэ-көтө, үлэлии-хамсыы, ыалдьыттары арыаллыы сылдьалларын көрдөххүнэ даҕаны астынаҕын. Кинилэр ахсааннара Саха сиригэр 4 тыһыынчаҕа тиийбитэ элбэҕи этэр.
Пуорум бастакы күнүгэр Смарт-бибилэтиэкэҕэ теоретическай дьарыктар уонна маастар-кылаастар ыытылыннылар. Бу күн пуорум чэрчитинэн тэрээһин кыттыылаахтара Суорун Омоллоон аатынан Опера уонна балет тыйаатырын дириэктэрэ Владислав Левочкины кытары атах тэпсэн олорон сэһэргэстилэр.
Кэпсэтии тиэмэтэ байыаннай дьайыы, волонтердар көмөлөрүгэр анаммыт буолан, Владислав Валерьевич Опера уонна балет тыйаатырын кэлэктиибэ, култуура волонтердарын көмөлөрүн уонна бырайыактарын билиһиннэрдэ.
Тыйаатыр кэлэктиибэ байыаннай дьайыыга сылдьар уолаттарга үбүнэн-харчынан, бородууктанан, табаарынан көмөлөһөр. Владислав Левочкин уолаттар Саха сириттэн кэлбит баһыылкалары туттахтарына, оҕолуу үөрэллэрин, дойдуларыгар баран кэлбит курдук сананалларын туһунан кэпсээтэ.
«Кинилэр үөрдэхтэринэ – биһиги эмиэ үөрэбит. Тыйаатыр үлэтэ күннээҕи уонна тирээн турар кыһалҕалары көрдөрүөхтээх. Ыччакка майгы-сигили сыаннастарын иҥэриигэ үлэ барар», – диэн тыйаатыр репертуарын билиһиннэрдэ. Ол иһигэр, Кыайыы 80 сылыгар анаан туруорбут «Подвиг» испэктээктэрэ РФ Оборонаҕа министиэристибэтин Махталын ылбыт.
Тыйааатыр кэлэктиибэ саҥа туруорууларыгар, араас тэрээһиннэригэр байыаннай дьайыы кыттыылаахтарын уонна кинилэр дьиэ кэргэттэрин хайаан да ыҥыран ыалдьыттатар, кинилэрдиин ситимнэрин быспаттар.

Култуура тэрилтэлэрин салайааччылара араас састаабынан тохсунньуга уонна муус устарга Донецкай Өрөспүүбүлүкэҕэ  волонтердар пууннарыгар тиийэн туттарбыттара, кыра кэнсиэр көрдөрбүттэрэ, уолаттары кытары кэпсэтэн, сүргэлэрин көтөхпүттэрэ.
Култуура волонтердарын пуорумун тэрээһиннэрэ бүгүн архыыпка, тыйаатырдарга салҕанар. Пуоруму үөрүүлээхтик сабыы ускуустуба оскуолатын 2 нүөмэрдээх саалатыгар буолуоҕа.