Култуура үлэһиттэрэ — Ньурба буойуттарыгар

Ньурба оройуонун култууратын департаменын көҕүлээһининэн култуура үлэһиттэрэ байыаннай эпэрээссийэҕэ сылдьар биир дойдулаахтарыгар анаан аһымал аахсыйа тэрийэннэр, кэнсиэрдээх култуурунай десаннар ыытылыннылар. Ол курдук кулун тутар ыйга Ньурба оройуонун култууратын үлэһиттэригэр иккис төгүлүн ыытыллар «Култуура аартыгынан» пуорум чэрчитинэн аһымал кэнсиэр Ньурба куоратын «Кыталык” култуура дыбарыаһыгар үрдүк таһымнаахтык буолан ааспытын туһунан Ньурба оройуонун култууратын департаменын начаалынньыга Розалия Тихонова кэпсиир.

— Култуура үлэһиттэрэ Малыкай, Хорула нэһилиэктэригэр култуурунай десанынан тахсан, нэһилиэк олохтоохторун, дьаһалтатын уонна тэрилтэ үлэһиттэрин кытары 2022-2027 сс. ылыллыбыт Ньурба оройуонун култууратын сайдыытын Кэнсиэпсийэтинэн салгыы былааннары кэпсэттилэр, оройуоннааҕы библиэтикэ ситимин үлэһиттэрэ бэлэмнээбит квест оонньууларыгар көхтөөхтүк кытыннылар. Аһымал кэнсиэргэ Ньурба оройуонун Култуураҕа департамена бэлэмнээбит көрөөччү дууһатын туппут «Алгыстаах илдьит. Хотойдуу кынатыҥ хорсуннук көттүн диэн…» анимационай видеоны олохтоохтор биһирии көрдүлэр. Бу видеоролик хорсун хоодуот уолаттарбытыгар анаммыт

Ньурба улууһун хоһоон айааччылара айбыт алгыстаах хоһооннорунан таҥыллан, Ньурба оройуонун Култуураҕа департаменын үлэһиттэрин ааҕыыларыгар уһуллан оҥоһуллубута. Инникитин алгыстаах илдьиппит кинигэ буолан, «Айар» кинигэ кыһатыгар 500 устууканан бэчээттэнэн, байыастарбытыгар харысхал быһыытынан бэриллиэҕэ.

Маны сэргэ норуот эмчитэ, алгысчыт Алиса Михайловна Иннокентьева, норуот маастара Наталия Федотовна Трофимова, Таркаайы нэһилиэгин “Бэйбэрикээн” эбээлэр түмсүүлэрэ улууспутугар үүнэр эмтээх-томтоох оттоох, амарах арчылыыр алгыстаах, «Эксперт полиграф” киин ойуу түһэрбит харысхал бэлиэлээх мөһөөччүктэр тигиллэн, бэлэмнэнэн ыытылыннылар.

Маны таһынан, Ньурба оройуонун култууратын пуондатыттан «Калейдоскоп” оҕо телестудията устубут “Дьулуур уонна кини хамаандата” диэн оҕолорго аналлаах киинэни тыа кулууптарынан көрдөрөн саҕалаатыбыт. Кэккэ кэмнэргэ Ньурба куоратыгар «Юнион» киинэ тыйаатырыгар көстөрө былааннанар. Киирбит үп-харчы байыаннай эпэрээссийэҕэ баҕа өттүнэн кытта сылдьар байыаспытыгар, Малдьаҕардааҕы Никииппэр Сэмиэнэп аатынан култуура киинин уус-уран салайааччытыгар Николай Борисович Слепцов-Дьолуоҕа ананар.

Бу күннэргэ Москуба куоракка бииргэ үлэлиир кэллиэгэбит Айаана Алексеевна Федорова тиийэн үлэлээтэ. Аһымал тэрээһиннэрбититтэн киирбит үбүнэн байыаннай эпэрээссийэ буолар сиригэр саамай наадалаах, сыаналаах квадрокоптеры, ону таһынан ас-таҥас атыылаһан, алгыстаах мөһөөччүктэри, харысхал-кинигэлэри, дойдуларыгар астаммыт арыылаах алаадьылары биир өттүнэн убайыгар, иккис өттүнэн Маартан төрүттээх биир дойдулаахпытыгар — РФ Бэрэсидьиэнигэр СӨ Бастайааннай бэрэстэбиитэлистибэтин эппиэттээх үлэһитигэр Архан Давид Евгеньевичка байыаннай сулууспалаах уолаттарбытыгар тиксэрэригэр илдьэн туттарда.
Биһиги улууспут култууратын үлэһиттэрэ муус устар 8 күнүгэр байыаннай сулууспалаахтарбытыгар көмөлөһөр сыаллаах Дьокуускайга оһуохай күрэҕин тэрийэн ыытыахпыт. Салгыы муус устар 10 күнүгэр киин куорат А.Е.Кулаковскай-Өксөкүлээх Өлөксөй аатынан Култуура дыбарыаһыгар кэнсиэртиибит. Ити тэрээһиннэрбититтэн төһө киирбитинэн барыта хомуллан пуондаҕа киирэн, байыаннай сулууспалаахтарбытыгар барыахтаах.

Ити курдук уолаттарбыт этэҥҥэ эрэ буолалларыгар Ньурба оройуонун култууратын үлэһиттэрэ көдьүүстээх көмөбүтүн, алгыстаах илдьиппитин инникитин да ыыта туруохпут.