Култуура үлэһиттэрэ тыа сиригэр үлэлии бардылар

2025 сылга Саха сиригэр  «Земскэй култуура үлэһитэ» федеральнай бырагырааманан 11 улууска 11 кубуота көрүллүбүтэ. Бастакы кыттааччылар быйыл балаҕан ыйыттан үлэлэрин саҕалаатылар.

«Бырайыак бастакы сылыгар ыраах сытар нэһилиэнньэлээх пууннарга оҕо ускуустуба оскуолаларыгар педагогическай каадырдар тиийбэттэрин быһаарыы сүрүн соругунан турбута. Ол түмүгэр, 11 улууска, ол иһигэр биэс Арктика улууһугар,  фортепиано, хореография, музыка учууталлара үлэлии бардылар», — диэн  култуура, духуобунайм сайдыы миниистирэ Афанасий Ноев  бэлиэтээтэ.

Музыка үрдүкү оскуолатын бүтэрбит, норуоттар икки ардыларынааҕы күрэхтэһиилэр кыайыылаахтара Робелла Артемьева Ньурба улууһун Маалыкай нэһилиэгэр Оҕо ускуустубатын оскуолатыгар фортепиано кылааһыгар үөрэтэн, музыкальнай салайааччынан үлэтин саҕалаата.

“Култуура министиэристибэтэ бу бырагырааманы эдэр исписэлиистэри өйүүр, улуустарга култуураны сайыннарар сыалтан оҥордо. Мин эдэр педагог быһыытынан, бу улахан суолталаах хамсааһынҥа кыттыһыахпын баҕарабын. Билигин саҥа дуоһунаспар биэс үөрэнээччилээхпин, ол эрээри, фортепиано уруогар интэриэстээх үөрэнээччилэри өссө бэйэбэр тардыам диэн эрэллээхпин”, — диэн бэлиэтээтэ.

«Земскэй култуура үлэһитэ» бырагыраама Арассыыйаҕа 2025 сыл атырдьах ыйын 1 күнүттэн бэрэсидьиэн Владимир Путин көҕүлээһининэн саҕаламмыта. Бырайыак «Култуура сайдыыта» судаарыстыбаннай бырагыраама чэрчитинэн олоххо киирэн, «Дьиэ кэргэн» национальнай бырайыак сыалларын-соруктарын толорор.

Кыттааччылар 2 мөлүйүөн солкуобай суумалаах биир кэмнээх төлөбүрү ылаллар, ону тэҥэ, талбыт үлэлэригэр кырата биэс сыл үлэлииргэ эбэһээтэлистибэни ылыналлар.

«Земскэй култуура үлэһитэ» бырагыраамаҕа култуура үлэһиттэрэ идэлээх уонна социальнай көҕүлээһиннэри олоххо киллэрэллэригэр усулуобуйаны тэрийии, ону тэҥэ тыа сиригэр уонна кыра куораттарга култуура тэрилтэлэригэр каадыр боппуруоһун быһаарар сорук турар.

Сиһилии: https://www.sakha.gov.ru/news/12052