“Култуура үлэһиттэригэр анаммыт сыл диэн өйдүүр сыыһа”

“Сахафильм” киинэ хампаанньа салайааччыта Алексей Егоров култуура, патриотизм туһунан санаатын үллэстэр:

-Ил Дархан бүгүн Ил Түмэҥҥэ туһаайан этиитигэр култуура норуоту кытта кэпсэтэр далаһанан буолар диэн  бэлиэтээтэ.

Киинэ култуура инники күөҥҥэ сылдьар салаата буолар, онон эппиэтинэспит улаханын өйдүүбүт. Быйыл өссө элбэх бырайыак күүтэр. “Тута” туһунан киинэни устууга бэлэмнэнии бара турар. Билигин этэр эрдэ, хайаан да уһулуохпут. Манна даҕатан, патриотизм туһунан этэр буоллахха, маны  инструмент, аҥардас култуура тэрилтэтэ эрэ ыытар тэрээһинин курдук көрөр табыллыбат. Бу хас биирдии төрөппүт эбээһинэһэ. Оттон сорохтор патриотизмы байыаннай дьыаланы кытта сибээстииллэр. Оннук буолбатах, патриотизм диэн төрөөбүт дойдуга, чугас дьоҥҥор, дьиэ кэргэҥҥэр, төрөөбүт дьиэҕэр таптал. Үчүгэйгэ, сырдыкка тардыһыы, сайдыыга дьулуһуу – бу эмиэ патриотизм. Бу барыбытыгар сыһыаннаах эрээри, култуура эйгэтэ быдан киэҥник хабан үлэлиир.  Онон Култуура сылыгар эрэ төрөөбүт дойдуга тапталы, патриотизмы айхаллаабакка, бу туһунан куруук саныы сылдьыаҕыҥ.

Култуура сыла, дьиҥэр култуура үлэһиттэригэр эрэ анаммат. Өрөспүүбүлүкэ хас биирдии олохтооҕо култуурабыт, устуоруйабыт, духуобунай сыаннастарбыт, үгэстэрбит сорҕолоро буолар. Онон бары бииргэ түмсэммит, кэлэр сылга дьоһуннаахтык үлэлиэҕиҥ-хамсыаҕыҥ. Бу сылтан тирэх ылан, өссө үрдүгү дабайыаҕыҥ!