Кулун тутар 1 күнүттэн микрозайм биэрии ирдэбилэ уустугуруо

Кулун тутар 1 күнүттэн  микрозайм ыларга киһи ким буоларын биометрия көмөтүнэн бигэргэтэр ирдэниэҕэ. Бу саҥа ирдэбил сүрүн сыала — киһи билбэтинэн кини аатыгар түөкүттэр кирэдьиит оҥоттороллорун тохтотуу, — диэн Биометрическэй технологиялар кииннэрин генеральнай дириэктэрин солбуйааччыта Владислав Святик иһитиннэрдэ.

«Бу сыл кулун тутар 1 күнүттэн онлайн микрозайм ыларга киһи ким буоларын биометриянан бигэргэтэр булгуччулаах буолуоҕа. Саҥа уларыйыы сыала — киһи билбэтинэн кини аатыгар микрозайм оҥотторорун суох оҥоруу», — диэн Святик РИА Новости-га иһитиннэрдэ.

Кини этэринэн, саҥа уларыйыы түөкүттэр гражданнар ааттарыттан үп-харчы өҥөтүнэн туһаналларын быдан уустугурдуохтаах. Бааҥҥа чопчулаабыттарынан, биометрическай дааннайдары микрозайм ыларга туттар наадаттан эрдэттэн бэлиэтэтиэххэ сөп. Ол хас да ньыманан оҥоһуллар:

• Баан салаатыгар. Боломуочуйалаах бааннар салааларыгар тиийдэххэ, үлэһиттэр куолаһы суруйарга уонна хаартыскаҕа түһэрэргэ көмөлөһөллөр. Дааннайдар тута судаарыстыбаннай биометрическай тиһиккэ киирэллэр.
• Дьиэҕэ ыҥыран. Ону таһынан, дьиэҕэ тиийэн бэлиэтиир босхо өҥөнөн туһаныахха сөп: үлэһиттэр ыйыллыбыт аадырыска бэйэлэрэ тиийэн, анал үлэни ыытыахтара.
• Сыһыарыы нөҥүө. «Госуслуги Биометрия» диэн сыһыарыы нөҥүө төлөпүөнтэн бэлиэтэниэххэ эмиэ сөп. Бу түгэҥҥэ смартфон көмөтүнэн биометрическай загранпааспары сканердаан, селфи оҥорон уонна куолас холобурун суруттарыахха наада.

Эспиэр быһаарбытынан, ити кэнниттэн онлайн кирэдьиит ыларга киһиэхэ камераҕа эрэ көрөр уонна экраҥҥа тахсыбыт сыыппаралары саҥарар ирдэниэҕэ. Оччоҕо тиһик килийиэн ким буоларын дааннайдары кытта тэҥнээн көрүөҕэ.