Кулун тутардааҕы «ЧОЛБОН»:  Маһары айана, Өксөкүлээх үйэтэ уонна казах суруйааччытын айар кут иччитин туһунан айымньыта

«Чолбон» сурунаал кулун тутардааҕы нүөмэригэр кэрэхсээҥ:

— Бас эрэдээктэр Гаврил Андросов бас тылыгар Өксөкүлээх үйэтин туһунан быһаарарын;
— норуот суруйааччыта Егор Неймохов «Улуу Кыайыы айымньылара» рубрикаҕа тахсыбыт «Аҕалаах оҕо кэпсэтиилэрэ» сэһэнигэр Аҕа дойду Улуу сэриитин мөллүйүөнүнэн толуктарын кэккэтигэр киирбит саха дьоно – саллаат уонна сэрии сылларын оҕотун бөлүһүөктүү диалогтарын;
—  90-с сыллардааҕы дьалхааннаах кэмҥэ ыччат эргиэҥҥэ сыстыытын, Саха Өрөспүүбүлүкэтин Конституциятын ылыныыга устудьуоннар суолталарын уонна эдэр саас таҥарата – Таптал туһунан Константин Эверстов «Сэргэлээххэ сэргэх күннэр» сэһэнигэр;
—  «Далбар Хотун» сурунаал бас эрэдээктэрэ Айталина Никифоров «Ийэ күүһэ» кэпсээнигэр тыаҕа муммут ийэ мүччүргэннээх сырыыларын;
— Поэт кэрэ куолар – Елизавета Мигалкина «Баайыам санаам саламатын үөһэ…» уонна Мария Андреева «Үүнэр күн үөрүүнү саҕыахтаах – ол эрэ иһин ырыа ылланыахтаах» диэн саҥа хоһооннорун бөлөхтөрүн;
— саҥа кэм драматура Утум Захаров «Маһары. Ыраахтааҕыга айан» пьесатын түмүгэр сахалар Россия судаарыстыбатын иһигэр бэйэни салайыыны туруулаһыыларын олуга ууруллуутун;
—  «Сүрэххэр баар уоту умуллардаххына, бэйэҕэр кыһаллыбат быһыыҥ кыайдаҕына, биирдэ бэриллибит олоххун хайдах чаҕылхайдык, уратытык олоруоххунуй?» диэн ыйытыыны туруорар казах аныгы суруйааччыта Абдилдабек Салыкбай «Иккиэйэҕин түлэй түүҥҥэ» кэпсээнин Анастасия Еремеева сахалыы тылбааһын;
— «Олоҥхо дойдутун айар түмсүүлэрэ» бырайыак ыалдьыттара – Мэҥэ Хаҥалас улууһун «Таммахтар» литература холбоһугун кыттыылаахтара Инна Николаева-Угинка уонна Константин Родионов дьиҥ олохтон ылыллыбыт кэпсээннэрин;
— Өксөкүлээх Өлөксөй айар үлэтин өр кэмҥэ үөрэппит Гуманитарнай чинчийии уонна хотугу аҕыйах ахсааннаах омуктар проблемаларын институтун литератураҕа уонна фольклорга салаатын сэбиэдиссэйэ, филология наукатын доктора Надежда Покатиловалыын Утум Захаров сэһэргэһиитин;
— «Биллиилээх суруйааччылар биографиялара» рубрикаҕа норуот суруйааччыта Куорсуннаах саха биир бастакы литератор дьахтара Вера Давыдова туһунан ыстатыйатын;
— «Оҕоҕун кытта аах» рубрикаҕа айар тыл аҕата Өксөкүлээх Өлөксөй кэнчээри ыччакка анаабыт хоһооннорун.

 Күн – сири, «Чолбон» – саханы сырдатар.

«Чолбон» сурунаал