Кулун тутарга Табаһыттар IV сийиэстэрэ ыытыллыаҕа

Дьокуускайга кулун тутар 18-21 күннэригэр Табаһыттар IV  сийиэстэригэр Саха сирин 20 оройуоннарыттан дэлэгээттэр, Кытайтан, Монголияттан ыалдьыттар, итиэннэ РФ Тыатын хаһаайыстыбатын министиэристибэтин бэрэстэбиитэллэрэ кыттыахтара.

Бу туһунан СӨ Тыатын хаһаайыстыбатын уонна ас-үөл бэлиитикэтин министиэристибэтин пресс-сулууспатын пресс-сулууспата иһитиннэрдэ.

Сийиэс кыттыылаахтара түөрт күн устата төрүт үгэһи оннунан хаалларыыны, ыччаты таба иитиигэ угуйууну уонна да атын тутаах боппуруостары дьүүллэһиэхтэрэ. Ону тэҥэ Саха сирин табаһыттара Арктикатааҕы судаарыстыбаннай агротехнологическай үнүбэрситиэккэ квалификацияны үрдэтэр кылгас болдьохтоох куурустарга үөрэниэхтэрэ.

Тэрээһин чэрчитинэн хаартыскаҕа, уруһуйга, табаһыттар уонна аҕыйах ахсааннах норуоттар төрүт национальнай таҥастарын көрдөрүүгэ, «Бастыҥ табаһыт көлүүр сыарҕата», өрөспүүбүлүкэтээҕи «Көһө сылдьар дьиэ кэргэн» куонкурустар, быыстапка-дьаарбаҥка ыытыллыахтара.

Ону тэҥэ үгэскэ кубулуйбут эрэгийиэннээҕи Табаһыттар оонньуулара ыытыллыаҕа- таба көлүүр сыарҕатыгар куоталаһыы, аркааны ыраах быраҕыы, хайыһарынан табаҕа состоруу, эстэпиэтэ буолуоҕа.

Улахан дьыалабыай бырагыырама үөрүүлээх кэнсиэр бырагырааматынан түмүктэниэ. Бырагыраамата сиһилии кэлин тахсыаҕа. Тэрээһин тэрийээччитэ — СӨ Тыатын хаһаайыстыбатын уонна ас-үөл бэлиитикэтин министиэристибэтэ.