“Куобах суорҕаны имэрийдибит”

Бу күннэргэ Өлөөн олохтоохторугар айылҕаттан айдарыылаах, талааннаах, ырыа- тойук куттаах Сунтаар оройуонун Далбар хотуттарын кытта көрсөн, атах тэпсэн олорон инникини, кэскиллээҕи кэпсэтии буолла.

Ол курдук, Сунтаар Кириэстээҕиттэн төрүттээх Изабелла Степановна- Сыдьаайа, сылгы иитиитинэн дьарыктанар, дьону-сэргэни көрсөргө, ыччаттары сахалыы олох үөрүйэхтэригэр үөрэтэр, такайар  аналлаах саха балаҕанын хаһаайката. Кини аргыһа Кириллина Антонина Степановна, Куокунуттан төрүттээх, иистэнньэҥнэри салайар. Саха таҥаһын, киэргэллэрин   кэтэн, бастакынан дьоллоох Дьокуускай уулуссатынан  сэлэлии хаампыт  маастардары, иистэнньэҥнэри саха таҥаһын киэҥ эйгэҕэ таһаарбыт, норуокка тарҕатааччы историческай наука хандьыдаата, өрөспүүбүлүкэ иистэнньэҥнэрин “Уран иис” түмсүү салайааччыта, ХИФУ преподавателэ, маастар, култуура туйгуна Петрова Светлана Ивановна үөрэнээччитэ.

Өлөөн, Харыйалаах бөһүөлэктэригэр көрсүһүүгэ кэлбит иистэнньэҥнэргэ 56 устуука куобах тириититтэн суорҕаны илдьэ кэлэн суолтатын кэпсээтилэр. Куобах саха норуотун, көс эбэҥкилэргэ уруккуттан сыаналанар, аччык сылларга төрүт аһылык, тымныыга сылаас хаттык таҥас, суорҕан буолан бүтүн ыалы ыалынан абыраан кэлбитэ. Бу суорҕаны куобах уорҕатын А-4 кээмэйдээх гына сиитэс таҥаска сирийэн элбэх иистэнньэҥ араас улуустартан ыытаннар, “Якутия мастеровая”  диэн Саха сиригэр 2023 сыллаахха ыытыллыбыт быыстапкаҕа көрсөн, түмсэн олорон холбообуттар. Онон иистэнньэҥнэр сомоҕолоһууларын бэлиэтэ буолан, улуустарынан көрдөрүүгэ сылдьар. Элбэх ыал ийэлэрэ, эбэлэрэ имигэс, талааннаах тарбахтарынан тикпит сылаас суорҕаннара сырдыкка тардыһыы, өбүгэлэрбит үөрүйэхтэрин  умнуллаары гыммытын тилиннэрии, иккистээн тыыннааһын, буола турар сэриигэ сылдьар буойуннар этэҥҥэ буолалларыгар алгыс, сомоҕолоһуу бэлиэтэ буолан, ыраах хоту Өлөөҥҥө тиийэн кэлбитин имэрийэн, илэ харахпытынан көрөн, сылаас санаабытын иҥэрдибит. Ыалдьыттары Өлөөн эбэ уҥа салаатыгар үрдүккэ харбаһар хайалардаах, кыыл таба кыырайар алыылардаах, тайах таалар арыылардаах Арҕаа салааҕа  сырытыннардыбыт, ыраас салгыны сайа тыынан айан аартыгын тутан кэллибит. Изабелла Степановна, Антонина Степановна сырыылара табыллан, суоллара тыргылла турда.   Өлөөн олохтоохторугар барҕа махталларын тиэртилэр. “Сайда-үүнэ туруҥ, ыччат дьоҥҥут төрөөбүт төрүт дойдуларыгар олохсуйдуннар, уйгуну- быйаҥы уһанныннар”, — диэн Сунтаардыы махтаннылар, сахалыы алгыс бастыҥын эттилэр.

Надежда Колодезникова, Өлөөн, Харыйалаах бөһүөлэгэ.

Хаартыскалары: ааптар ыытта