Куокуйга эһэ дьиэ түннүгүн алдьатан киирбит (видео)

Кэбээйи улууһун Куокуй нэһилиэгин киһи наһаа мыыммат, балачча элбэх дьонноох-сэргэлээх нэһилиэнньэлээх пуун. Дьэ, ону ол диэбэккэ, иллэрээ күн тыатааҕы киирэн, биир дьиэҕэ айбардаан ааспыт.

Дьиэлээх хаһаайка ол күн балтыгар ыалдьыттыы тиийэн баран, дьолго хоно хаалбыт. Эһэ түүн түннүгү алдьатан киирэн, дьиэ иһин үлтү ыспыт, куукуна ыскаабын урусхаллаабыт, мохоруону соһуспут.

Иллэрээ сыл эһэ бу дьиэни кытта кэккэлэһэ турар дьиэ тэлгэһэтигэр эмиэ киирэ сылдьыбыта биллэр. Дьиэлээх хаһаайыны көрөн куоппут.

Сир аһа саамай ситэр-буһар кэмигэр маннык “ыалдьыттар” аттыгар хаамса сылдьаллара чахчы кутталлаах. Саалаах, эр киһилээх, элбэх буолан сылдьар наада буолбут.